ខ្សែប្រយុទ្ធ Anthony Martial ទំនងជានឹងផ្ទេរទៅលេងនៅក្រុម Sevilla ក្រោមលក្ខខណ្ឌខ្ចីជើងហើយ ក្រោយពីភាគីទាំងសងខាងបានចរចាត្រូវគ្នាអស់ហើយ។
ក្រុម Sevilla បានយល់ព្រមបង់ប្រាក់៥លានផោនសម្រាប់ការខ្ចីជើង Martial ពីក្រុម Manchester United ខណៈដែលកីឡាករផ្ទាល់ក៏នឹងទទួលការកាត់ប្រាក់ខែខ្លះនៅពេលផ្ទេរទៅលេងនៅប្រទេសអេស្ប៉ាញផងដែរ។ ការយល់ព្រមលក្ខខណ្ឌនេះ ក៏ព្រោះតែកីឡាករបារាំងលែងមានអារម្មណ៍លេងនៅ Old Trafford ទៀតហើយ ព្រោះមិនសូវទទួលបានឱកាសឡើយ។
កីឡាករវ័យ២៦ឆ្នាំបានប្រាប់ទៅថ្នាក់ដឹកនាំក្រុមបិសាចក្រហមផ្ទាល់តែម្ដង ថារូបគេចង់ចេញ ហើយក្លឹប Sevilla ជាជម្រើសទី១របស់គេ បើទោះជាមានក្រុមនៅអង់គ្លេសមួយចំនួនចាប់អារម្មណ៍ក៏ដោយ។ ស្របពេលការទៅលេងនៅ Sevilla នេះទៀតសោត ក្រុមមួយនេះក៏កំពុងប្រជែងពានរង្វាន់ La Liga ជាមួយក្រុម Real Madrid ដែរ៕ ប្រភព៖ DAILYMAIL
