ដោយមើលឃើញអនាគតមិនប្រាកដប្រជារបស់យុវជន Kylian Mbappe ទីបំផុតកីឡាកររៀមច្បង Zlatan Ibrahimovic ក៏បានចេញមកផ្តល់យោបល់ នូវការសម្រេចចិត្ត ថាគួរជ្រើសរើសក្លឹបណា បន្ទាប់ចាកចេញពីក្លឹប Paris Saint-Germain។
ជាការពិត កីឡាករបារាំង សេសសល់សុពលភាពកុងត្រាជាមួយក្លឹបមានមូលដ្ឋានក្នុងទីក្រុងប៉ារីស ត្រឹមចុងខែមិថុនា ឆ្នាំ ២០២២ ដែលមានន័យថា ត្រឹមខែមករានេះ កីឡាករអាចមានសិទ្ធចរចាលក្ខណៈ Pre-Contract ជាមួយភាគីក្លឹបដទៃ ឬក៏អាចរង់ចាំដល់ថ្ងៃទី ១ កក្កដា ដើម្បីសម្រេចការផ្ទេរផ្លូវការណាមួយ នៅលក្ខខណ្ឌឥតតម្លៃខ្លួន។
បើតាមការផ្តល់បទសម្ភាសន៍របស់ Zlatan ប្រាប់ទៅ L’Equipe បានឲ្យដឹងថា៖ “មានតែ Kylian ទេ ដែលគេអាចផ្តល់ចម្លើយ ថាទ្រនំបន្ទាប់គឺជាទីណា ដោយវាស៊ីសងលើការសម្រេចចិត្តរបស់គេផ្ទាល់ គ្រាន់ថាបើជាខ្ញុំ គឺខ្ញុំប្រាកដជានឹងចាកចេញ”។
លោកបន្ត៖ “តែបើខ្ញុំជាក្លឹប PSG ក៏នឹងព្យាយាមគ្រប់បែបយ៉ាង ដើម្បីរក្សាជើងគេដូចគ្នា តែត្រង់ថា ក្នុងកាលៈទេសៈនេះ គឺកីឡាករជាអ្នកសម្រេចចិត្ត បើ PSG ចង់ឲ្យគេនៅ តែគេផ្ទាល់មិនចង់នៅ ក៏អត់ទៅរួចដែរ រួចគេក៏បានសួរនាំខ្ញុំ ហើយខ្ញុំឆ្លើយថា បើខ្ញុំជាឯង នោះគឺនឹងផ្ទេរទៅក្លឹប Real Madrid ជាក់ជាមិនខាន”។
“ខ្ញុំធ្លាប់មានឱកាសលេងឲ្យក្លឹបផ្សេងពីគ្នា ប្រទេសនិងពានរង្វាន់ផ្សេងគ្នា គឺរបៀបហ្នឹង ជាអ្វីដែលខ្ញុំបានរៀនសូត្រ និងទទួលការអភិវឌ្ឍខ្លួន ជាការពិត ការលេងនៅប្រទេសកំណើត គឺវាងាយស្រួលពេល តាមការយល់ឃើញរបស់ខ្ញុំ ដូច្នេះហើយ អ្នកត្រូវតែរៀបបង្វិច រួចផ្លាស់ទៅកន្លែងថ្មី នោះទើបជាដំណើរផ្សងព្រេងពិតប្រាកដ”។
បញ្ជាក់ដែរថា ខ្សែប្រយុទ្ធវ័យ ២៣ ឆ្នាំ គេមិនទាន់ភ្លក់រសជាតិលេងនៅក្រៅប្រទេសនោះទេ ដោយតាំងពីដើមមក ធ្លាប់បានលេងឲ្យក្លឹប AS Monaco និង PSG។ សរុបស្ថិតិក្នុងអាជីព ២៦១ ប្រកួត រកបាន ១៨១ គ្រាប់និង Assist ៩៤ លើក។
ក៏បង្វែរទៅរឿងមួយផ្សេងទៀត ពាក់ព័ន្ធនឹងអនាគតរបស់ Ousmane Dembele ក៏ត្រូវបានជើងចាស់ David Sanchez ណែនាំឲ្យផ្ទេរទៅក្លឹបថ្មីមួយដែរ តែសំខាន់នោះគឺជាក្លឹបគូប្រជែងកាន់ឆ្នាំរបស់ Barcelona។
សម្រាប់ Dembele ត្រូវបានក្លឹបអាណាព្យាបាល Barcelona បញ្ជាក់ជាសាធារណៈហើយ ថាចាំបាច់ត្រូវតែទៅរកក្លឹបថ្មីឲ្យបានមុនថ្ងៃទី ៣១ មករា មិនដូច្នោះទេ ទោះបន្តឈរជើង ក៏ក្លឹបមិនផ្តល់ឱកាសឲ្យលេងដែរ។ នេះជាការលើកឡើង បន្ទាប់ពីការចរចាកុងត្រាថ្មីអស់រយៈពេល ៧ ខែ តែមិនសម្រេចទៅបាន ហើយជួនពេលដែលសុពលភាពកុងត្រា នឹងត្រូវផុតនៅចុងខែមិថុនាខាងមុខ។
តាមការលើកឡើងរបស់ លោក David Sanchez បានឲ្យដឹងថា៖ “ខ្ញុំចង់ឲ្យ Dembele ផ្ទេរទៅក្លឹប Real Madrid ដោយខ្ញុំអត់ខ្វល់ថាទីណាទេ សំខាន់ពេលនេះ គឺគេគួរតែចាកចេញពី Barcelona ឲ្យឆាប់រហ័សតាមដែលអាចធ្វើទៅបាន”។
លោកបន្ត៖ “ខ្ញុំក៏អត់ខ្វល់ដូចគ្នា ប្រសិនគេត្រូវពាក់ឈុតស ព្រោះអីខ្ញុំមានតែរីករាយខ្លាំង ការដែលអាចឃើញ Dembele លេងឲ្យក្លឹប Real Madrid”៕
ប្រភព៖ Goal