ក្លឹបមាន់ខ្នាយមាស Tottenham Hotspur ត្រូវបានគេរាយការណ៍ថា កំពុងដាក់ខ្លួនចូលប្រជែងជាមួយបណ្តាក្លឹបធំៗនៅអង់គ្លេសឯទៀតដែរហើយ ជុំវិញការចង់បានខ្សែបម្រើ Franck Kessie ពីក្លឹប AC Milan នៅទីផ្សារដោះដូរខែមករានេះ។
តាមថាបុរសវ័យ ២៥ ឆ្នាំ ត្រូវផុតកុងត្រានៅចុងខែមិថុនា ឆ្នាំ ២០២២ ខាងមុខ តែយ៉ាងណាគេមានសិទ្ធអាចចរចាជាមួយក្លឹបដទៃនៅលក្ខខណ្ឌចុះកុងត្រាទុកជាមុន Pre-Contract ត្រឹមខែនេះបាន មុនបង្ហាញខ្លួនជាផ្លូវការនៅក្រោយខែមិថុនា។
បើតាមសារព័ត៌មាន Daily Telegraph ចុះផ្សាយថា ក្លឹបមាន់ខ្នាយមាស នឹងចូលប្រជែងជាមួយក្លឹប Arsenal, Man Utd, Liverpool ក៏ដូចជាក្លឹបយក្សក្រៅលីគ Barcelona, Real Madrid, PSG ដើម្បីសម្រេចចម្លើយចេញពីមាត់ Kessie ថានឹងជ្រើសយកក្លឹបណាមួយ ជាទ្រនំបន្ទាប់។
គួរឲ្យដឹងថា Kessie គេបានមកចូលរួមជាមួយ Milan នៅចុងខែមិថុនា ឆ្នាំ ២០១៩ ជាមួយតម្លៃផ្ទេឬ ២៤ លានអឺរ៉ូ។ សរុបស្ថិតិនៃការបង្ហាញខ្លួន ២០៥ ប្រកួត គេរកបាន ៣៥ គ្រាប់និង Assist ១៦ លើក៕ ប្រភព៖ Daily Telegraph