នៅវេលាម៉ោង ០៣:០០ នាទីទាបភ្លឺ ឈានចូលថ្ងៃសុក្រ សម្រាប់ការប្រកួតពានរង្វាន់ Copa del Rey វគ្គ ១៦ ក្រុមចុងក្រោយ ក្លឹបអ្នកមានបុណ្យ Barcelona នឹងត្រូវជួប Athletic Club តែអ្វីដែលគេចាប់អារម្មណ៍ ក្នុងបញ្ជីកីឡាករត្រូវចូលរួម គឺគ្មានឈ្មោះខ្សែប្រយុទ្ធស្លាប Ousmane Dembele នោះទេ។
វាអាចជាដល់ទីបញ្ចប់របស់កីឡាករបារាំង នៅ Barcelona ត្រឹមប៉ុណ្ណឹងហើយ ជាពិសេសក្រោយនាយកផ្នែកកីឡាលោក Mateu Alemany ចេញមកបញ្ជក់ច្បាស់ៗថា Dembele ត្រូវតែរកក្លឹបថ្មី ដែលគេចង់ទៅជាចាំបាច់ មុនថ្ងៃទី ៣១ មករា បើមិនដូច្នោះទេ ទោះបន្តឈរជើង ក៏ក្លឹបមិនឲ្យចូលរួមការប្រកួតដែរ។
លោក Alemany លើកឡើងថា៖ “យើងបានចាប់ផ្តើមជជែកជាមួយភ្នាក់ងាររបស់ Dembele តាំងតែពីខែកក្កដាមកម្ល៉េះ ពោល ៦ ឬ ៧ ខែហើយ ដោយយើងព្យាយាមស្វែងរកគ្រប់មធ្យោបាយដើម្បីឲ្យកីឡាករបន្តនៅជាមួយយើង តែគេបានបដិសេធ ដូច្នេះពេលវេលាសេសសល់មុនបិទទីផ្សារដោះដូរសារនេះ ក្លឹបក៏យល់ពីអ្វីដែលកីឡាករចង់បាន គឺមិនចង់បន្តកុងត្រាថ្មី ដូច្នេះយើងសុំឲ្យគេចាកចេញ ដោយទៅរកក្លឹបថ្មីណាមួយ មុនថ្ងៃទី ៣១ មករា”៕
ប្រភព៖ Marca