ក្លឹបនៅឯអ៊ីតាលី គឺ Udinese និងក្លឹបអង់គ្លេស Arsenal ទីបំផុតបានឈានដល់កិច្ចព្រមព្រៀងផ្លូវការ ជុំវិញការប្រកាស ការផ្ទេរនៅលក្ខខណ្ឌខ្ចីជើង នៃខ្សែការពារកណ្តាល Pablo Mari រយៈពេល ៦ ខែនៃរដូវកាលសេសសល់។
បុរសវ័យ ២៨ ឆ្នាំ ដែលមិនសូវទទួលបានពេលវេលាបង្ហាញខ្លួន ក្រោមការដឹកនាំរបស់លោក Mikel Arteta ក៏សម្រេចជ្រើសទៅទ្រនំថ្មី គឺក្លឹប Udinese ដោយរំពឹងថានៅទីនោះ នឹងអាចផ្តល់ឱកាសឈរជើងលើទីលានសម្រាប់គេបានច្រើនជាងមុន។ ជាមួយ Arsenal រដូវកាល ២០២១/២២ Mari បង្ហាញខ្លួនបានតែ ៣ ប្រកួតគត់។
តាមរយៈការប្រកាសលើ Twitter សាមីខ្លួនកីឡាករផ្ទាល់ រៀបរាប់ថា៖ “ខ្ញុំពិតជារីករាយនិងមានមោទនភាព ក្នុងការបោះជំហានទៅកាន់ការផ្សងព្រេងថ្មី ហើយក៏នឹងផ្តល់គ្រប់យ៉ាងឲ្យល្អបំផុត សម្រាប់ក្លឹបមួយនេះ ក៏ដូចជាអ្នកគាំទ្រ FORZA UDINESE”។ រំឭកថា កិច្ចព្រមព្រៀងសារនេះ មិនមានបញ្ចូលលក្ខខណ្ឌជម្រើសទិញផ្តាច់នោះទេ ខណៈដែលសុពលភាពកុងត្រារបស់គេ ត្រូវផុតនៅចុងខែមិថុនា ឆ្នាំ ២០២៤៕
ប្រភព៖ Sportsmole