បើទោះបីជាអាយុរាងជ្រេ ចូល ៣៦ ឆ្នាំទៅហើយក្តី តែការចាប់អារម្មណ៍មកលើសមត្ថភាពខ្សែបម្រើ Luka Modric គឺនៅតែមាន ហើយនេះសុទ្ធជាសំណាក់ក្លឹបយក្សនៅអឺរ៉ុបថែមទៀត។ ទៅមើលសុពលភាពកុងត្រារបស់កីឡាករក្រូអាត សេសសល់ត្រឹមចុងខែមិថុនា ឆ្នាំ ២០២២ ដែលមានន័យថា កីឡាករអាចចរចាលក្ខណៈ Pre-Contract ត្រឹមខែមករាតទៅ។
យ៉ាងណាយើងក៏ទទួលដំណឹងមកថា ក្លឹបយក្ស Man City នៅឯអង់គ្លេស បានមើលឃើញឱកាសសារនេះ ហើយពិតជាស្រលាញ់ពេញចិត្តលើសមត្ថភាព Modric ជាខ្លាំង រួចក៏បានដាក់សំណើចង់នាំយកគេមក Premier League សារជាថ្មី។
បើតាមសារព័ត៌មាន El Nacional ចុះផ្សាយថា Modric គេបានបដិសេធសំណើនោះហើយ បើទោះបី City ព្រមផ្តល់ឲ្យកុងត្រា ដល់ទៅរយៈពេល ២ ឆ្នាំក៏ពិតមែន។ តាមពិត ខ្សែបម្រើខាងលើ ទំនងជាបន្តដាក់គោលដៅឈរជើងឲ្យក្លឹបអធិរាជស រហូតដល់ថ្ងៃចុងក្រោយនៃអាជីព គ្រាន់ថាការចរចាកុងត្រាថ្មីមិនទាន់សម្រេច។
រំឭកដែរថា Modric បានផ្ទេរចេញពីក្លឹប Spurs មកចូលរួមជាមួយ Real Madrid នៅរដូវក្តៅ ឆ្នាំ ២០១២។ សរុបស្ថិតិការបង្ហាញខ្លួន ៤១៣ ប្រកួត រកបាន ២៩ គ្រាប់និង Assist ៦៦ លើក ហើយក៏ធ្លាប់លើកពានរង្វាន់ឯកត្តជន Ballon d’Or នៅទីនេះផងដែរ៕
ប្រភព៖ El Nacional