កីឡាករកាន់ឆ្នាំ Karim Benzema បានជូនដំណឹងទៅកាន់ថ្នាក់លើក្លឹប Real Madrid រួចជាស្រេចហើយ ថានៅបញ្ចប់រដូវកាលខាងមុខ គេនឹងចាកចេញ ប្រសិនណាក្លឹបសម្រេចការចុះហត្ថលេខានាំយកកីឡាករចេញពីក្លឹប Borussia Dortmund។
បើតាមសារព័ត៌មាន El Nacional ចុះផ្សាយថា Benzema មិនចង់ឲ្យមានអ្នកថ្មី មកលេង Role ប្រយុទ្ធកណ្តាលដូចជាខ្លួននោះទេ ជាពិសេសគឺ Erling Haaland ផ្ទាល់តែម្តង។ ក៏ដោយសារកីឡាករបារាំង មិនចង់បាត់បង់ឱកាសបង្ហាញខ្លួនលើទីលាន និងបារម្ភ ខ្លាចត្រូវក្លាយជាតួរង ប្រសិនណាមានវត្តមានយុវជនសញ្ជាតិន័រវេសមកដល់ Bernabeu។
យ៉ាងណាយើងមិនច្បាស់ថា ការចង់បានរបស់ Benzema នឹងត្រូវបានប្រធានក្លឹបលោក Florentino Perez យល់ព្រមឬអត់ទេ ដ្បិតអីកត្តាអាយុរបស់គេ ក៏កាន់តែរាងចំណាស់ ជ្រេចូល ៣៤ ឆ្នាំទៅហើយ។ បញ្ជាក់ឲ្យដឹងដែរថា អតីតខ្សែប្រយុទ្ធក្លឹប Lyon បានមកចូលរួមជាមួយក្លឹបស្តេចស Madrid កាលពីរដូវក្តៅ ឆ្នាំ ២០០៩ ពោលគិតមកទល់ពេលនេះ ឆ្លងកាត់រយៈពេលជាង ១ ទសវត្សមកហើយ។ សរុបស្ថិតិនៃការបង្ហាញខ្លួន ៥៨៦ ប្រកួត គេរកបាន ៣០៣ គ្រាប់និង Assist ១៥៣ លើក។
ដោយឡែកបង្វែរទៅមើល យុវជន Erling Haaland ឯណោះវិញ បើទោះបីគេត្រូវផុតកុងត្រានាចុងខែមិថុនា ឆ្នាំ ២០២៤ តែត្រឹមខែកញ្ញា ឆ្នាំ ២០២២ ក្នុងកិច្ចព្រមព្រៀងតម្លៃផ្ដាច់កុងត្រា ឬ Release Clause ជាមួយក្លឹបអាណាព្យាបាល Dortmund នឹងត្រូវចាប់បើកដំណើរការហើយ ជាមួយតម្លៃផ្ទេរតែ ៦៨ លានផោនប៉ុណ្ណោះ។
ដូច្នេះមិនថាតែក្លឹប R.Madrid ឬក្លឹបយក្សណាក៏ដោយ ពួកគេអាចមានសិទ្ធ នាំយកកីឡាករវ័យ ២១ ឆ្នាំមកចូលរួម នៅតម្លៃទាបត្រឹម ៦៨ លានផោន ឬ ៧៥ លានអឺរ៉ូ ដោយមិនចាំបាច់ឆ្លងកាត់ការចរចាតម្លៃអ្វីទៀតនោះទេ ជាមួយភាគីក្លឹប Dortmund។ គុណភាពរបស់ Haaland រដូវកាលនេះ នៅតែឃើញថាល្អ ដោយ ១៩ ប្រកួត រកបាន ២២ គ្រាប់និង Assist ៦ លើក។
បែបនេះហើយ បើលោក Perez ដែលជាប្រធានក្លឹប គិតថា ការនាំយក Haaland ជារឿងចាំបាច់ នោះការបោះបង់ Benzema ក៏ត្រូវតែធ្វើដូចគ្នា។ តែវាក៏ស៊ីសងលើការសម្រេចចិត្តរបស់កីឡាករផ្ទាល់ ព្រោះក្រៅពី Real តួយ៉ាងមានក្លឹប Barcelona, Man City, Man Utd, Chelsea, Bayern Munich និង PSG ជាដើម សុទ្ធតែចាប់ចិត្តមកលើយុវជនវ័យ ២១ ឆ្នាំ។
បើតាមសារព័ត៌មាន MARCA ក្លឹបដែលចង់បាន Haaland បើបូកសរុបកញ្ចប់ត្រូវចំណាយ ទាំងលើតម្លៃផ្ទេរ និងការចាយវាយផ្សេងៗ គឺ ត្រូវមានថវិកាយ៉ាងហោចណាស់ ២៩២ លានផោន ឬ ៣៥០ លានអឺរ៉ូ។ នេះដោយសារតែតម្លៃផ្តាច់កុងត្រា ៦៣ លានផោន បូកបន្ថែមនឹងប្រាក់ភាគលាភត្រូវផ្តល់ឲ្យភ្នាក់ងាររត់ការលោក Mino Raiola និងឪពុកបង្កើតរបស់ Haaland ក៏ដូចជាប្រាក់ឈ្នួល លើកុងត្រារយៈពេល ៦ ឆ្នាំផ្សេងទៀត។
យ៉ាងណាក៏មានផ្លូវមួយផ្សេងទៀតដែល R.Madrid អាចជ្រើសរើស ហើយនៅតែអាចរក្សាជើង Benzema នោះគឺជំនួសពីការយក Haaland ដោយជ្រើសការយក Kylian Mbappe ពីក្លឹប PSG។ សម្រាប់ខ្សែប្រយុទ្ធវ័យក្មេងរបស់ក្លឹបបារាំង ក៏នឹងត្រូវផុតកុងត្រានាចុងខែមិថុនា ឆ្នាំ ២០២២ ដែលមានន័យថា ក្លឹបនឹងមិនចាំបាច់ចាយលុយសូម្បីតែមួយសេន្តលើតម្លៃផ្ទេរ។
ការនាំយក Mbappe មក Bernabeu នេះសោត ក៏នឹងមិនធ្វើឲ្យ Benzema មានការទើសទាល់ចិត្តដែរ ពោលគឺ Mbappe អាចលេងតំណែងស្លាប ហើយ Benzema បន្តលេងប្រយុទ្ធកណ្តាល ដូចដែលពួកគេធ្លាប់សហការគ្នាយ៉ាងល្អ កំឡុងពេលលេងឲ្យក្រុមជម្រើសជាតិបារាំង៕
ប្រភព៖ El Nacional