ពានរង្វាន់ឯកត្តជននាមកីឡាករល្អបំផុតប្រចាំឆ្នាំ ឬយើងស្គាល់ថា The Best FIFA Men’s Player of The Year ទីបំផុតបានរកឃើញអ្នកឈ្នះហើយកាលពីថ្ងៃទី ១៧ មករាកន្លងទៅ ដោយបានទៅលើខ្សែប្រយុទ្ធនៃក្លឹប Bayern Munich និងជម្រើសជាតិប៉ូឡូញ កីឡាករ Robert Lewandowski។
ដូចបានបញ្ជាក់កាលពីសព្វមួយដង សម្រាប់លទ្ធផលអ្នកឈ្នះពាន The Best របស់ FIFA គឺសម្រេចផ្អែកតាមសំឡេងគាំទ្រជា ៤ ផ្នែក ដោយមានអ្នកតំណាងស្ថាប័នសារព័ត៌មាន ប្រធានក្រុម អ្នកចាត់ការក្រុមជម្រើសជាតិ ដែលមានឈ្មោះជាសមាជិករបស់ FIFA ក៏ដូចជាការបោះឆ្នោតពីសំណាក់អ្នកគាំទ្រលើគេហទំព័រផ្លូវការ។
ចុះអ្នកមានដឹងទេថា តើបុគ្គលទាំង ៣ រូប តំណាងឲ្យកម្ពុជា សម្រាប់ពាន The Best ឆ្នាំ ២០២១ ពួកគាត់បោះឆ្នោតឲ្យនរណាខ្លះ? បើតាមទិន្នន័យស្រង់ចេញពីការចុះផ្សាយរបស់គេហទំព័រ MARCA យើងធ្វើការបង្ហាញចម្លើយដូចតទៅ៖ (បញ្ជាក់ អ្នកឈរឈ្មោះទី ១ បាន ៥ ពិន្ទុ អ្នកទី ២ បាន ៣ ពិន្ទុ និងអ្នកទី ៣ បាន ១ ពិន្ទុ)
តំណាងឲ្យប្រធានក្រុមជម្រើសជាតិកម្ពុជា កីឡាករ សឿយ វិសាល ជ្រើសយក Robert Lewandowski, Jorginho និង N’Golo Kante
តំណាងឲ្យអ្នកចាត់ការក្រុមជម្រើសជាតិកម្ពុជា លោក Ryu Hirose ជ្រើសយក Robert Lewandowski, Kylian Mbappe និង Mohamed Salah
តំណាងឲ្យស្ថាប័នសារព័ត៌មានកម្ពុជា លោក អុឹង ចំរើន ជ្រើសយក Robert Lewandowski, Lionel Messi និង Mohamed Salah
ដោយឡែកយើងក៏នឹងបន្ត ធ្វើការបង្ហាញនូវលទ្ធផលបោះឆ្នោតចេញពីប្រធាន និងអ្នកចាត់ការនៃក្រុមជម្រើសជាតិកំពូលទាំង ៥ ផ្សេងទៀត៖
ប្រធានក្រុមបែលហ្សិក កីឡាករ Eden Hazard ជ្រើសយក Karim Benzema, Kevin de Bruyne និង Jorginho
រីឯអ្នកចាត់ការបែលហ្សិក លោក Roberto Martinez ជ្រើសយក Kevin de Bruyne, Jorginho និង Robert Lewandowski
ប្រធានក្រុម កីឡាករ Hugo Lloris និងអ្នកចាត់ការបារាំង លោក Didier Deschamps ជ្រើសយកដូចគ្នា មាន Karim Benzema, Kylian Mbappe និង N’Golo Kante
ប្រធានក្រុមប្រេស៊ីល កីឡាករ Thiago Silva ជ្រើសយក Neymar, Robert Lewandowski និង Jorginho
រីឯអ្នកចាត់ការប្រេស៊ីល លោក Adenor Bachi ជ្រើសយក Robert Lewandowski, Mohamed Salah និង Karim Benzema
ប្រធានក្រុមព័រទុយហ្គាល់ កីឡាករ Cristiano Ronaldo ជ្រើសយក Robert Lewandowski, N’Golo Kante និង Jorginho
រីឯអ្នកចាត់ការព័រទុយហ្គាល់ លោក Fernando Santos ជ្រើសយក N’Golo Kante, Jorginho និង Robert Lewandowski
ប្រធានក្រុមអាហ្សង់ទីន Lionel Messi ជ្រើសយក Neymar, Kylian Mbappe និង Karim Benzema
រីឯអ្នកចាត់ការអាហ្សង់ទីន លោក Lionel Scaloni ជ្រើសយក Lionel Messi, Kylian Mbappe និង Neymar៕