អនាគតខ្សែប្រយុទ្ធវ័យ ៣៤ ឆ្នាំ Karim Benzema អាចនឹងឈានដល់ផ្លូវបំបែកនៅរដូវក្តៅខាងមុខ ប្រសិនណាជាក្លឹបអាណាព្យាបាលរបស់ខ្លួន នាំយកខ្សែប្រយុទ្ធចំណូលថ្មី Erling Haaland ចេញពី Borussia Dortmund បានសម្រេច។
តាមសារព័ត៌មាន El Nacional ចុះផ្សាយថា គោលដៅធំ ២ របស់ប្រធានក្លឹបលោក Florentino Perez ចង់នាំយកមកទឹកដី Bernabeu គឺរវាង Erling Haaland និង Kylian Mbappe តែក្លឹបក៏មិនច្បាស់ថា អាចនឹងយកបានទាំងពីរ ឬយកបានតែមួយហើយជានរណានោះដែរ។ តែយ៉ាងណាសម្រាប់ខ្ញីចាស់នៅអធិរាជស គឺ Benzema បានប្រាកដក្នុងចិត្តច្បាស់ហើយថា បើ Mbappe នោះមិនអីទេ តែបើជា Haaland នោះគេនឹងចាកចេញហើយ។
ក៏ដោយសារតែប្រសិនជា Mbappe នោះគេមានការយល់ចិត្តគ្នាស្រាប់លើទីលាន ដោយសារធ្លាប់លេងរួមគ្នា នៅឯក្រុមជម្រើសជាតិបារាំង តែជាមួយវត្តមានកីឡាករន័រវេស សម្រាប់ខ្សែប្រយុទ្ធ Benzema គឺមិនសូវជាពេញចិត្តប៉ុន្មានឡើយ។
គួរឲ្យដឹងថា នេះក៏អាចជាហេតុផលដែល Benzema មិនទាន់សម្រេចចិត្តបន្តកុងត្រាថ្មីផងដែរ ដ្បិតអីសុពលភាពកុងត្រានៅសល់ត្រឹមចុងខែមិថុនា ឆ្នាំ ២០២៣។ អ៊ីចឹងប្រហែលជារៀមច្បងខាងលើ រង់ចាំអុតមើលសិនថាតើ Madrid នឹងយកមួយណា រវាង Mbappe ឬក៏ Haaland?
ប្រភព៖ El Nacional