ក្លឹបតោខៀវ Chelsea បន្ទាប់ពីជួបបញ្ហារបួស Ben Chilwell និង Reece James ក៏នាំឲ្យពួកគេកំពុងវិលវល់ខ្លាំងនៅតំបន់ការពារ ព្រោះអីជាក់ស្តែងដូចតំណែងស្លាបឆ្វេង សល់តែ Marcos Alonso មួយប៉ុណ្ណោះ ដូច្នេះបើមានបញ្ហាអ្វីបន្តទៀត គឺប្រាកដជាវីវរមិនខាន។
ជួនពេលដែលក្លឹបកំពុងដាក់គោលដៅប្រជែងពាន Premier League រដូវកាលនេះផង ក៏នាំឲ្យតម្រូវការ លើការនាំយកអ្នកថ្មី មកបំពេញតំបន់ការពារ គឺជារឿងចាំបាច់ដែលត្រូវតែធ្វើ សម្រាប់ទីផ្សារដោះដូរខែមករា។
បើតាមសារព័ត៌មាន Sky Sports News ចុះផ្សាយថា ក្លឹបដឹកនាំដោយអ្នកចាត់ការលោក Thomas Tuchel បានចាប់អារម្មណ៍ ចង់ខ្ចីជើងរយៈពេល ៦ ខែសិន ពីភាគីក្លឹប PSG ជុំវិញការនាំយកកីឡាករ Layvin Kurzawa ដើម្បីមកស្រកួរ ក្នុងករណី Marcos Alonso មានបញ្ហាដោយប្រការណាមួយ។
ទៅមើលខ្សែការពារវ័យ ២៩ ឆ្នាំ របស់ PSG រាប់បានជាកីឡាករកាន់ឆ្នាំមួយរូបហើយ ដោយបានចុះហត្ថលេខាកុងត្រារយៈពេល ៤ ឆ្នាំ កាលពី ឆ្នាំ ២០២០ កន្លងទៅ។ តែយ៉ាងណារដូវកាល ២០២១/២២ គេសឹងតែមិនបានលេងទាល់តែសោះ ក្រោមការដឹកនាំរបស់លោក Mauricio Pochettino ដូច្នេះហើយទើបជំរុញចិត្តអតីតគ្រូចាស់លោក Tuchel ចង់បានគេមក Stamford Bridge ខ្លាំងម្លឹងៗ៕
ប្រភព៖ Sky Sports News