ខ្សែប្រយុទ្ធប្រេស៊ីល Roberto Firmino បើទោះបីជាប៉ុន្មានខែចុងក្រោយ ឃើញធ្វើមិនសូវបានល្អ តែយ៉ាងណាសមត្ថភាពរបស់គេ នៅតែទាក់ចិត្តក្លឹបដឹកនាំដោយលោក Xavi Hernandez គឺ Barcelona ហើយថែមទាំងចង់បើកការចរចាច្បាស់លាស់មួយ នៅរដូវក្តៅ ឆ្នាំ ២០២២ ខាងមុខ។
សម្រាប់បុរសវ័យ ៣០ ឆ្នាំ គេមិនសូវបានលេងជាប់លាប់ទេ ជាពិសេសក្រោយ Diogo Jota មកចូលរួមនៅហង្ស។ ជាក់ស្តែងរដូវកាល ២០២១/២២ សរុប ២២ ប្រកួតនៅលីគ សម្រាប់កីឡាករប្រេស៊ីលទើបជាប់ជម្រើសដំបូង ៥ លើកប៉ុណ្ណោះ។
បើតាមសារព័ត៌មាន El Nacional ចុះផ្សាយថា ក្រុមដឹកនាំដោយលោក Jurgen Klopp ក៏ទំនងជាព្រមបើកផ្លូវឲ្យ Firmino ចាកចេញផងដែរ ហើយឥឡូវ Barcelona ក៏បានដាក់សំណើច្បាស់លាស់មួយទៅហើយ គឺសុំត្រឹមតម្លៃខ្លួន ១៦,៥ លានផោន។
យើងមិនច្បាស់ថា ក្លឹប Liverpool យល់ព្រមឬអត់ទេ ស្របពេលដែលសុពលភាពកុងត្រារបស់ខ្សែប្រយុទ្ធកណ្តាលសេសសល់ដល់ចុងខែមិថុនា ឆ្នាំ ២០២៣។ សរុបការបង្ហាញខ្លួន ៣១០ ប្រកួត រកបាន ៩៤ គ្រាប់និង Assist ៧៣ លើក ចាប់តាំងការផ្ទេរចេញពី Hoffenheim នៅឆ្នាំ ២០១៥៕
ប្រភព៖ El Nacional