កន្លងមកគេឃើញ Cristiano Ronaldo បានពាក់ផ្លាកប្រធានក្រុមជំនួស Harry Maguire តែយ៉ាងណានៅប្រកួតបន្ទាប់នេះ ប្រសិនជាវត្តមានខ្សែការពារខាងលើត្រលប់មកវិញ នោះក៏នឹងប្រគល់តំណែងជាប្រធានក្រុមទៅឲ្យគេវិញដដែល ពោលនឹងពុំមានការផ្លាស់ប្តូរអ្វីឡើយ។
និយាយមុនដល់ការប្រកួត ដែល Man Utd ត្រូវប៉ះ Aston Villa នៅចុងសប្តាហ៍នេះ អ្នកចាត់ការលោក Ralf Rangnick បានបញ្ជាក់៖ “ពេលនេះ ខ្ញុំមើលមិនឃើញហេតុផលណាមួយ ដែលត្រូវផ្លាស់ប្តូរទេ ហើយ Harry គេនឹងនៅតែបន្តជាប្រធានក្រុមដដែល ដោយវាជារឿងធម្មតាទេ បើគេអត់បានលេង ដូច្នេះអ្នកផ្សេងនឹងមកជំនួសបណ្តោះអាសន្ន”។
លោកបន្ត៖ “ការផ្លាស់ប្តូរនេះ វាស៊ីសងលើកីឡាករណាដែលត្រូវលេង ដោយមិនមែនតែ Cristiano ទេ ជាក់ស្តែងយើងក៏មាន Edinson Cavani ក៏ដូចជាកីឡាករឯទៀត David de Gea, Victor Lindelof និង Bruno Fernandes ជាដើម ពោលសុទ្ធជាកីឡាករមានបទពិសោធន៍ក្រាស់ក្រែល”។
រំឭកដែរថា Aston Villa នឹងត្រូវប្រកួតទល់ Man Utd នៅវេលាយប់នេះ ម៉ោង ១២:០០ នាទីរំលងអាធ្រាត្រ មានផ្សាយផ្ទាល់លើទំព័រ CTS Sports។ គិតត្រឹមជុំទី ១៩ United ឈរលេខ ៧ មាន ៣១ ពិន្ទុ ខណៈដែល Villa មាន ២២ ពិន្ទុ ឈរលេខ ១៤៕
ប្រភព៖ Sportsmole