បន្ទាប់ពីយកឈ្នះទៅលើ Barcelona កាលពីវគ្គ ៤ ក្រុមចុងក្រោយ ក៏សម្រេចរុញឲ្យក្លឹបអធិរាជស Real Madrid ត្រូវឡើងមកកាន់វគ្គផ្តាច់ព្រ័ត្រ តតាំងសត្រូវចាស់ Athletic Bilbao នៅវេលាម៉ោង ០១:៣០ នាទីទាបភ្លឺ ឈានចូលថ្ងៃទី ១៧ មករា ឆ្នាំ ២០២២ ខាងមុខ មានផ្សាយផ្ទាល់លើទំព័រ CTS Sports។
យ៉ាងណាយើងទទួលបានដំណឹងជាមុន ថាប្រកួតពាន Supercopa de Espana ឬពាន Super cup ប្រចាំប្រទេសអេស្ប៉ាញ វគ្គដ៏សំខាន់នេះ គឺ R.Madrid នឹងនៅតែបន្តអវត្តមានខ្សែការពារឆ្នើម David Alaba ដោយគេបានខកខានតាំងពីប្រកួតវគ្គ ៤ ក្រុម ដោយសារបញ្ហារបួសសរសៃពួរ។
បើតាមសារព័ត៌មាន Marca ចុះផ្សាយថា បុរសវ័យ ២៩ ឆ្នាំ នឹងមិនអាចរៀបចំខ្លួនចូលរួមទាន់ពេលវេលាទេ ពោលនឹងបន្តសម្រាក ដើម្បីព្យាបាលរបួសរបស់ខ្លួននៅឯទឹកដីអេស្ប៉ាញ ហើយសូម្បីប្រកួតប៉ះ Elche នៅពាន Copa del Rey រំលងនោះប៉ុន្មានថ្ងៃបន្ទាប់ ក៏មិនប្រាកដប្រជាដែរ។
និយាយទៅតំបន់ការពាររបស់ Real Madrid ក៏មិនពេញជើងល្អដែរ ដោយសូម្បីការពារស្លាប Dani Carvajal ក៏តេស្តឃើញវិជ្ជមានកូវីដ១៩ ដូច្នេះ ៤ រូបខាងក្រោយ ទំនងជាប្រើប្រាស់ Lucas Vazquez ទៅជំនួស Carvajal ហើយស្លាបឆ្វេងប្រើ Ferland Mendy និងកណ្តាលមាន Nacho ក៏ដូចជា Eder Militao៕
ប្រភព៖ Football-Espana