ប្រចាំខែធ្នូ នៅក្របខ័ណ្ឌ Premier League ពានឯកត្តជននាមកីឡាករល្អបំផុត គឺបានប្រកាសចេញមកហើយ ដោយបានទៅលើខ្សែប្រយុទ្ធនៃក្លឹប Manchester City គឺ Raheem Sterling។ បុរសវ័យ ២៧ ឆ្នាំ បានចូលរួមចំណែកយ៉ាងសកម្ម នៅការលេង ៥ ប្រកួតឲ្យក្រុមលោក Pep Guardiola ហើយគេអាចរកបានដល់ទៅ ៥ គ្រាប់និង Assist ១ លើក។
កំឡុងពេលនោះ គេក៏បានក្លាយជាកីឡាករទី ៣២ នៅប្រវត្តិសាស្រ្ត Premier League អាចរកបាន ១០០ គ្រាប់ផងដែរ ពោលនៅការប្រកួត ដែល City យកឈ្នះ Wolves ១-០។ បញ្ជាក់ថានេះគឺជាលើកទី ៣ ហើយក្នុងអាជីពរបស់កីឡាករអង់គ្លេស ដែលបានឈ្នះពានរង្វាន់ កីឡាករល្អបំផុតប្រចាំខែ ដោយអតីតកាលធ្លាប់ឈ្នះកាលពីខែសីហា ឆ្នាំ ២០១៦ និងខែវិច្ឆិកា ឆ្នាំ ២០១៨។
ការឈ្នះសារនេះ គេបាននាំមុខ ទៅលើបេក្ខភាពឯទៀតដូចជា Gabriel Martinelli, Martin Odegaard, Mason Mount, James Maddison, Son Heung-min និង Joao Cancelo ដែលសុទ្ធសឹងបានបង្ហាញទម្រង់លេងល្អ ប្រចាំខែធ្នូ។ គួរឲ្យដឹង ប្រកួតបន្ទាប់របស់ក្លឹប Man City នឹងត្រូវប៉ះ Chelsea នៅល្ងាចថ្ងៃសៅរ៍ វេលាម៉ោង ១៩:៣០ នាទី មានផ្សាយផ្ទាល់លើទំព័រ CTS Sports៕
ប្រភព៖ Sportsmole