នៅវេលាម៉ោង ១៩:៣០ នាទីយប់ ថ្ងៃសៅរ៍ ទី ១៥ មករា ក្លឹបមេឃខៀវ Man City នឹងត្រូវបើកកីឡដ្ឋានស្វាគមន៍ក្លឹបតោខៀវ Chelsea ដែលនេះជាជំនួបដ៏ពិសេសមួយ ប្រចាំសប្តាហ៍នៅ Premier League។
យ៉ាងណាមុនឈានដល់ការប្រកួត តាមរយៈការឲ្យដឹងពីលោក Thomas Tuchel ជាអ្នកចាត់ការ បានបញ្ជាក់ជាមុន កូនក្រុមរបស់ខ្លួន គឺ Andreas Christensen នឹងពុំមានឈ្មោះចូលរួមការប្រកួតទេ ក៏ដោយសារតេស្តឃើញមានផ្ទុកជំងឺ COVID-19។ កន្លងមកនៅប្រកួតយកឈ្នះ Spurs នៃពាន EFL Cup គឺមានវត្តមានកីឡាករវ័យ ២៥ ឆ្នាំ តែយ៉ាងណាមកដល់ប្រកួតបន្ទាប់នេះ នឹងមិនមានវត្តមានគេឡើយ។
តាមថា មិនត្រឹមតែខកខានការប្រកួតនៅឯទឹកដី Etihad ទេ ទៀតសោតក៏ទំនងជាបន្តអវត្តមាននៅប្រកួតទល់ Brighton នាវេលាទាបភ្លឺ ឈានចូលថ្ងៃទី ១៩ មករាផងដែរ ពោលប្រហែលដល់ប្រកួតទល់ Spurs នាថ្ងៃទី ២៣ ទើបរំពឹងអាចត្រលប់មកវិញ។ គួរឲ្យដឹងថា កីឡាករសញ្ជាតិដាណឺម៉ាកគេសេសសល់កុងត្រាជាមួយតោខៀវ ត្រឹមចុងខែមិថុនាខាងមុខប៉ុណ្ណោះ ហើយមិនមានដំណឹងថា នឹងបន្តកុងត្រាថ្មីឡើយ ខណៈក្លឹបបន្ទាប់ អាចជានឹងទៅចូលរួមជាមួយ Dortmund៕
ប្រភព៖ Sportsmole