ក្លឹបអេស្ប៉ាញ Atletico Madrid ត្រូវបានគេរាយការណ៍ថា កំពុងបើកភ្លើងខៀវ ក្នុងការអនុញ្ញាតឲ្យខ្សែប្រយុទ្ធវ័យក្មេង Joao Felix ផ្ទេរទៅកាន់ក្លឹបអង់គ្លេស Manchester City សម្រាប់រដូវក្តៅខាងមុខ បន្ទាប់ពីមើលឃើញ ការធ្លាក់ចុះនៃទម្រង់លេងនៅរយៈពេលចុងក្រោយ។
ខ្សែប្រយុទ្ធពាក់អាវលេខ ៧ នៅក្លឹបក្រហមស ទើបតែរកបាន ៣ គ្រាប់ប៉ុណ្ណោះ នៅការបង្ហាញខ្លួនសរុប ១៨ ប្រកួតឲ្យក្រុមលោក Diego Simeone រដូវកាលនេះ។ តែយ៉ាងណា លឺថាលោក Pep Guardiola អ្នកចាត់ការក្លឹប Man City នៅតែចាប់ចិត្ត មកលើកីឡាករព័រទុយហ្គាល់ ហើយចង់បានគេឲ្យមកចូលរួមនៅក្របខ័ណ្ឌ Premier League។ នេះបើតាមសារព័ត៌មាន Sport Witness បានចុះផ្សាយ។
Atletico ទំនងជាចង់លក់ចេញ Felix នៅតម្លៃកប់ពពកណាមួយ ព្រោះអីបានសម្លឹងឃើញគោលដៅថ្មីហើយ ជាយុវជននៃក្លឹប Benfica គឺ Darwin Nunez។ រំឭកថាតម្លៃផ្ទេរដើម ដែល Atletico ចាយយក Feix កាលពីរដូវក្តៅ ឆ្នាំ ២០១៩ អស់ដល់ ១១៣ លានផោន ខណៈការលក់ចេញសារនេះ បើតាមហាងឆេង គឺអាចទទួលបានល្បាក់ ៥០ លានផោន ពោលរំពឹងខាតជាង ៥០ ភាគរយឯណោះ៕
ប្រភព៖ Sport Witness