ក្លឹបតោខៀវ Chelsea នៅតែបន្តការលេងដ៏ល្អ ជាមួយលទ្ធផលយកឈ្នះ ១-០ សរុបពីរជើង ៣-០ ទៅលើ Tottenham Hotspur ហើយចាប់បានឱកាសឡើងទៅកាន់វគ្គផ្តាច់ព្រ័ត្រ ពានរង្វាន់ EFL Cup ឬ Carabao Cup កាលពីយប់មិញ។
ជាមួយជ័យជម្នះសារនេះ ពួកគេនៅរង់ចាំអុតមើលលទ្ធផលរវាង Liverpool និង Arsenal ដែលត្រូវមានមួយក្លាយជាគូប្រជែង ដណ្តើមពានខាងលើ នៅថ្ងៃទី ២៧ កុម្ភៈ។ យ៉ាងណាគិតត្រឹមយប់មិញ លោក Thomas Tuchel ជាអ្នកចាត់ការ ក៏បានបង្កើតកំណត់ត្រាប្រវត្តិសាស្រ្តថ្មីមួយហើយសម្រាប់ក្លឹប Chelsea។
ចាប់តាំងពីការបង្កើតក្លឹបនៅឆ្នាំ ១៩០៥ នេះគឺជាគ្រូដំបូងគេបង្អស់ហើយ ដែលត្រឹមរយៈពេល ៣៥០ ថ្ងៃ នៃការដឹកនាំក្លឹប លោកអាចដឹកនាំឲ្យក្លឹបឡើងដល់វគ្គផ្តាច់ព្រ័ត្រនៅពានរង្វាន់៣ ផ្សេងគ្នា មាន League Cup, FA Cup និង Champions League/European Cup។
ជាការពិត សម្រាប់ពានរង្វាន់ទាំង ៣ គឺ Champions League ដែល Chelsea បានក្លាយជាម្ចាស់ជើងឯក ស្របពេលដែល FA Cup បានរបូតទៅឲ្យខាងក្លឹប Leicester City។ ឥឡូវរង់ចាំអុតមើលពាន League Cup វិញម្តង តើគ្រូសញ្ជាតិអាល្លឺម៉ង់ នឹងសម្រេចបានឬបែបណា? គួរបញ្ជាក់ថា ចំណាត់ថ្នាក់នៅ Premier League ឯណោះ ក្លឹបម្ចាស់ដី Stamford Bridge ក៏កំពុងឈរនៅលេខរៀងទី ២ ផងដែរ៕
ប្រភព៖ Opta