ពានរង្វាន់ The Best របស់ FIFA សម្រាប់ឆ្នាំ ២០២១ ត្រូវបានអូសបន្លាយពេល មកត្រៀមធ្វើការប្រកាស នៅថ្ងៃទី ១៧ មករា ឆ្នាំ ២០២២ ខាងមុខ ដោយពានរង្វាន់ឯកត្តជនមួយនេះ ប្រគល់ជូនសម្រាប់កីឡាករ/កីឡាការនី អ្នកចាំទី និងអ្នកចាត់ការ ដែលបង្ហាញសមិទ្ធផលល្អបំផុតប្រចាំឆ្នាំ។
យ៉ាងណាក្នុងចំណោមពានឯកត្តជនទាំងអស់ គឺមានតែពាន កីឡាករល្អបំផុត ឬ The Best FIFA Men’s Player of The Year តែប៉ុណ្ណោះ ដែលផ្ទុះការចាប់អារម្មណ៍ខ្លាំងជាងគេ ពីសំណាក់អ្នកគាំទ្រទូទាំងសកលលោក។ សារនេះ FIFA ក៏បានចម្រាញ់មកដល់បេក្ខភាព ៣ រូបចុងក្រោយដែរ និងទើបប្រកាសកាលពីថ្ងៃមុន គឺរួមមាន Robert Lewandowski, Mohamed Salah និង Lionel Messi។
ងាកមកក្នុងអត្ថបទនេះ ទំព័រ CTS Sports សូមធ្វើការសង្ខេបបង្ហាញនូវចំណុចលេចធ្លោមួយចំនួន របស់កីឡាករទាំង ៣ រូប មុនគ្នាយើងធ្វើការបោះឆ្នោត ថានរណាសក្តិសមនឹងក្លាយជាម្ចាស់ពាន The Best 2021៖
៣) Robert Lewandowski ក្លឹប Bayern Munich និងជម្រើសជាតិប៉ូឡូញ
ជាម្ចាស់ពាន The Best កាលពីឆ្នាំ ២០២០ ហើយមកដល់ឆ្នាំ ២០២១ ក៏កំពុងឈរលើភាគរយ អាចនឹងឈ្នះវាសារជាថ្មីទៀតហើយ។ ខ្សែប្រយុទ្ធសញ្ជាតិប៉ូឡូញ ជាមួយក្លឹបគេបានឈ្នះពានរង្វាន់ FIFA Club World Cup ហើយក៏បានបំបែកកំណត់ត្រាចាស់របស់ Gerd Muller នាមកីឡាកររកបានគ្រាប់បាល់ច្រើនបំផុតនៅរដូវកាលទោល ប្រចាំប្រវត្តិសាស្ត្រ Bundesliga គឺធ្វើបាន ៤១ គ្រាប់។
តើអ្នកមានដឹងដែរទេ? លើសពីនេះ Lewandowski ក៏ជាកីឡាករដំបូងនៅប្រវត្តិសាស្ត្រលីគកំពូលអាល្លឺម៉ង់ ដែលអាចឈ្នះ Top Scorer ចំនួន ៤ រដូវកាលជាប់ៗគ្នា។
២) Mohamed Salah ក្លឹប Liverpool និងជម្រើសជាតិអេហ្សីប
ខ្សែប្រយុទ្ធវ័យ ២៩ ឆ្នាំ នៅរដូវកាល ២០២០/២១ រាប់គ្រប់ការប្រកួតទាំងអស់ គេរកបាន ៣១ គ្រាប់ឲ្យក្លឹប Liverpool។ ជាងនេះ Salah ក៏បានក្លាយជាកីឡាករហង្សក្រហមដំបូងបង្អស់ ដែលអាចរកបានច្រើនជាង ២០ គ្រាប់ នៅ ៣ រដូវកាលផ្សេងគ្នា នៃក្របខ័ណ្ឌ Premier League។
ចុះអ្នកមានដឹងដែរទេ? Salah គេក៏បានបំបែកកំណត់ត្រា នាមកីឡាករអាហ្រ្វិករកបានគ្រាប់បាល់ច្រើនដាច់គេនៅប្រវត្តិសាស្ត្រ Premier League ដោយធ្វើបាន ១១៣ គ្រាប់ គិតមុនថ្ងៃប្រកាសពាន The Best ដែលនេះយកឈ្នះអ្នកគ្រងចាស់ គឺវីរបុរស Didier Drogba ធ្វើបាន ១០៤ គ្រាប់។
១) Lionel Messi ក្លឹប Barcelona/PSG និងជម្រើសជាតិអាហ្សង់ទីន
នៅរដូវកាលចុងក្រោយរបស់ Messi ជាមួយអ្នកមានបុណ្យ គេក៏បានឈ្នះពាន Top Scorer លើកទី ៨ នៅឯលីគកំពូលអេស្ប៉ាញ ដោយរកបាន ៣០ គ្រាប់។ រីឯជាមួយជម្រើសជាតិ កំឡុងការប្រកួតពានរង្វាន់ Copa America 2021 បុរសវ័យ ៣៤ ឆ្នាំ ក៏បានចូលរួមចំណែកបង្កើតសមិទ្ធផលជោគជ័យយ៉ាងធំធេង ជាមួយក្រុមអាហ្សង់ទីនផងដែរ។
នោះគឺក្រៅពីជួយក្រុមឈ្នះពានរង្វាន់លើកដំបូងក្នុងអាជីព ទៅមើលពានឯកត្តជនប្រចាំព្រឹត្តិការណ៍ ក៏ Messi បានឈ្នះទាំងពាន Golden Ball និង Golden Boot ថែមទៀត។
តើអ្នកមានដឹងដែរទេ? Messi គេរកបាន ៤ គ្រាប់និង Assist ដល់ទៅ ៥ លើកនៅ Copa America 2021 ហើយអ្វីដែលសំខាន់ គេគឺជាកីឡាករដែលបង្កើតឱកាសស៊ុតបាល់ និងកាត់បាល់ (Through Balls) ច្រើនជាងនរណាទាំងអស់ នៅការប្រកួតដែលប្រេស៊ីលធ្វើជាម្ចាស់ផ្ទះ។ សរុបមក តើសម្រាប់គ្នាយើង គិតថាកីឡាកររូបណាទៅ ដែលសក្តិសមនឹងកាន់ពាន The Best 2021?
ប្រភព៖ FIFA