អ្នកចាត់ការនៃក្លឹបសេះបង្កង់ Juventus លោក Massimiliano Allegri បានបញ្ជាក់ច្បាស់កាលពីពេលថ្មីៗនេះថា ខ្សែប្រយុទ្ធ Alvaro Morata នឹងមិនចាកចេញទៅណានោះទេ សម្រាប់ទីផ្សារដោះដូរខាងមុខ ពោលក៏បដិសេធនូវចចាមអារ៉ាមទាំងឡាយដែលបានចុះផ្សាយនៅពេលចុងក្រោយ។
ជាការពិត សម្រាប់បុរសសញ្ជាតិអេស្ប៉ាញដែល Juventus បានខ្ចីជើងពី Atletico Madrid ស្រាប់តែលឺដំណឹងថា អាចនឹងផ្ទេរទៅក្លឹប Barcelona នៅទីផ្សារដោះដូរខែមករា។ មានទាំងរបាយការណ៍ចុះផ្សាយថា ការចរចាសម្រេចទៅបាន ៩៥ ភាគរយទៀតផង តែយ៉ាងណា គ្រូធំសញ្ជាតិអ៊ីតាលីនិយាយច្បាស់ៗពេលនេះ ថាគ្មានរឿងនោះកើតឡើងទេ។
Allegri ថា៖ “ខ្ញុំប្រាប់អ្នកចុះ រឿង Alvaro គេនឹងបន្តនៅទីនេះ គេនឹងមិនចាកចេញពី Juventus ទេ ហើយសុំបញ្ចប់រឿងត្រឹមតែប៉ុណ្ណឹង”។ គួរបញ្ជាក់ដែរថា ខ្សែប្រយុទ្ធវ័យ ២៩ ឆ្នាំ បានបង្ហាញខ្លួន ២៣ ប្រកួត រកបាន ៧ គ្រាប់និង Assist ៣ លើកឲ្យសេះបង្កង់ ហើយនៅបញ្ចប់រដូវកាល ក្លឹបក៏ទំនងជានឹងទិញគេផ្តាច់កុងត្រានៅតម្លៃ ២៩ លានផោនក៏ថាបាន៕
ប្រភព៖ Sportsmole