ក្លឹបកាំភ្លើងធំ Arsenal ត្រូវបានគេរាយការណ៍ថា កំពុងចាប់អារម្មណ៍ក្នុងការចង់បានខ្សែប្រយុទ្ធ វ័យក្មេងចេញពី ក្លឹប Fiorentina ហើយការចរចា គឺចង់ផ្តល់ឲ្យនូវកីឡាកររបស់ខ្លួន Lucas Torreira បូកនឹងលុយសុទ្ធ ៤៦ លានផោនផ្សេងទៀត។
ជាការពិត Torreira សម្រាប់លោក Mikel Arteta ទុកក៏មិនចំណេញ ដកចេញក៏មិនខាត ជារួមក្លឹបលែងសូវប្រើប្រាស់វត្តមានរបស់គេទៀតហើយនៅរយៈពេលចុងក្រោយ។ ទន្ទឹមដែលសុពលភាពកុងត្រាកៀកនឹងផុតនៅឆ្នាំក្រោយផង ដូច្នេះក្លឹបចង់កាត់កងប្រគល់គេឲ្យទៅក្លឹបអ៊ីតាលីផ្ទាល់តែម្តង។
វាជួនពេលដែលសព្វថ្ងៃគេក៏កំពុងខ្ចីជើងឲ្យ Fiorentina ស្រាប់ តែត្រូវសុពលភាពត្រឹមចុងខែមិថុនាខាងមុខ ដល់ឥឡូវ Arsenal ថានឹងមិនយកវិញទេ ហើយស៊ូឲ្យផ្តាច់តែម្តង តែសុំមកវិញនូវខ្សែប្រយុទ្ធ Dusan Vlahovic រួចក្លឹបអង់គ្លេសក៏នឹងព្រមបន្ថែមលុយសុទ្ធ ៤៦ លានផោនផ្សេងទៀត។ នេះបើតាមសារព័ត៌មាន Gazzetta dello Sport បានចុះផ្សាយ។
យើងមិនច្បាស់ថា ភាគីក្លឹប Fiorentina ព្រមសំណើនេះឬអត់ទេ តែដូចអ្នករាល់គ្នាបានដឹង Vlahovic គេកំពុងក្លាយជាគ្រាប់ពេជ្រនៅ Serie A សព្វថ្ងៃ។ យុវជនវ័យ ២១ ឆ្នាំ បង្ហាញខ្លួន ២២ ប្រកួត រកបាន ១៨ គ្រាប់និង Assist ៣ លើកឲ្យក្លឹបនៅរដូវកាលនេះ៕
ប្រភព៖ Gazzetta dello Sport