ក្លឹបតោខៀវ Chelsea ត្រូវបានគេរាយការណ៍ថា កំពុងតែចាប់អារម្មណ៍ក្នុងការប្រជែងជាមួយនឹងក្លឹបបិសាចក្រហម Man Utd លើការចង់បាន ខ្សែបម្រើការពារនៃក្លឹប West Ham United នោះគឺ Declan Rice សម្រាប់ទីផ្សារដោះដូរ ក្រោយបញ្ចប់រដូវកាល។
បញ្ជាក់ឲ្យដឹងថា បុរសវ័យ ២២ ឆ្នាំ ជាយុវជនរបស់ក្រុមញញួរ តែមុននឹងគេមកហ្វឹកហាត់នៅ West Ham ដើមឡើយ គេក៏ធ្លាប់ចាយពេលឲ្យក្លឹបនៅទឹកដី Stamford Bridge ជាច្រើនឆ្នាំផងដែរ។ ដូច្នេះហើយក្លឹបតោខៀវ ក៏ចាប់អារម្មណ៍ចង់បានយុវជនរបស់គេត្រលប់ទៅវិញ បើទោះបីជាបច្ចុប្បន្នស្ថិតនៅតម្លៃកប់ពពកមួយក្តី។នេះបើតាមសារព័ត៌មាន Gola បានចុះផ្សាយ។
តម្លៃខ្លួនរបស់កីឡាករអង់គ្លេស អាចថ្លៃល្បាក់ ១០០ លានផោន ដែល United ឯណោះ ក៏មិនរអានឹងតម្លៃមួយនេះដែរ ខណៈដែលសុពលភាពកុងត្រារបស់គេ ត្រូវផុតនៅរយៈពេល ២ ឆ្នាំកន្លះ។ រំឭកស្ថិតិរបស់គេបន្តិច បង្ហាញខ្លួន ១៦៩ ប្រកួត រកបាន ៨ គ្រាប់និង Assist ៩ លើក រាប់ចាប់តាំងពីបង្ហាញខ្លួននៅឈុតធំ នាឆ្នាំ ២០១៥៕
ប្រភព៖ Goal