មាត់ឥតគម្រប ជាពាក្យរិះគន់ដែលអ្នកគាំទ្រមួយចំនួនបាននិយាយមកកាន់ Romelu Lukaku បន្ទាប់ពីផ្តល់បទសម្ភាសន៍កាលពីពេលកន្លងទៅ មានផ្សារភ្ជាប់ក្នុងអត្ថន័យប៉ះទង្គិចមកលើក្លឹបអាណាព្យាបាលបច្ចុប្បន្នគឺ តោខៀវ Chelsea។
នៅមិននៅកីឡាករបែលហ្សិកបែរជានិយាយថា៖ “ដើមឡើយមុនគិតចង់ផ្ទេរចេញពី Inter Milan ជម្រើសក្លឹបធំ ៣ ក្នុងក្តីស្រមៃរបស់ខ្ញុំ គឺរួមមាន Bayern Munich, Real Madrid និង Barcelona រីឯ Chelsea គឺរំលេចមកតាមក្រោយ ពោលបន្ទាប់ពីភាគីក្លឹបអង់គ្លេសធ្វើការទាក់ទងមកកាន់ខ្ញុំផ្ទាល់”។ អត្ថន័យនេះ Lukaku ចង់មានន័យថា Chelsea មិនធំជាងក្លឹប ៣ ឯទៀតទេ ជារួមគឺស្ថិតនៅជម្រើសទី ៤ តែប៉ុណ្ណោះក្នុងការសម្រេចចិត្ត។
ឆ្លើយតបនឹងការលើកឡើងនេះ លោក Thomas Tuchel ដែលជាអ្នកចាត់ការ បានមានការខឹងសម្បាជាខ្លាំង ដល់ថ្នាក់ដកឈ្មោះកីឡាករវ័យ ២៨ ឆ្នាំ មិនឲ្យចូលរួមប្រកួតទល់ Liverpool កាលពីថ្ងៃអាទិត្យ។ នៅប្រកួតបន្តបន្ទាប់ គេមិនច្បាស់ថាអនាគតរបស់ខ្សែប្រយុទ្ធខាងលើទៅជាបែបណាទេ តែតាមដឹង គឺក្លឹបកំពុងទាមទារឲ្យ Lukaku ចេញមកសុំទោសជាសាធារណៈ មិនដូច្នោះទេ ក្លឹបក៏នឹងមិនញញើតក្នុងការលក់គេចេញទៅវិញដែរ។
បើតាមសារព័ត៌មាន Gazzetta dello Sport ចុះផ្សាយថា Lukaku ក៏មិនទាន់ច្បាស់ ១០០ ភាគរយ ថានឹងចង់បន្តនៅ ឬចាកចេញនោះដែរ តែគ្រាន់ថា បើគិតដល់ផ្លូវបែក សម្រាប់ទ្រនំបន្ទាប់ គេនឹងជ្រើសយកការផ្ទេរទៅក្លឹប Tottenham Hotspur ដើម្បីរួបរួមជាមួយអតីតអ្នកចាត់ការលោក Antonio Conte។
គួរឲ្យដឹងថា អ្នកទាំងពីរធ្លាប់បានសហការរួមគ្នាជាគ្រូនិងសិស្ស កាលនៅ Inter Milan រួចក៏បានលើកពានរង្វាន់លីគកំពូលនៅទីនោះផងដែរ មុនចាកចេញ ហើយជ្រើសយកទ្រនំថ្មីនៅអង់គ្លេស គ្រាន់តែក្លឹបផ្សេងគ្នា។ យ៉ាងណាការរួបរួមរវាងអ្នកទាំងពីរ ក៏អាចនឹងកើតឡើងម្តងទៀត ជាពិសេសក្រោយមានការបើកភ្លើងខៀវច្បាស់ៗ ពីអ្នកចាត់ការសញ្ជាតិអ៊ីតាលី ថារឿង Lukaku ជាមួយ Chelsea ខ្លួនសុំមិនលូកដៃអ្វីទាំងអស់ តែគ្រាន់ថា ជាមួយអតីតកូនក្រុមចាស់ លោកនៅតែមានអារម្មណ៍ពេញចិត្តលើសមត្ថភាពរបស់គេដដែល។
នេះថាមិនត្រូវ Spurs អាចនឹងលៃលកចាយលុយធំ នាំយក Lukaku មកក៏ថាបាន ស្របពេលដែលសុពលភាពកុងត្រានៅឯ Stamford Bridge សេសសល់រយៈពេល ៤ ឆ្នាំកន្លះ ហើយតម្លៃខ្លួននឹងមិនក្រោម ៩០ លានផោនឡើយ។ តែវាក៏អាចកាត់កងជាមួយនឹងការចាកចេញរបស់ Harry Kane ព្រោះអនាគតប្រធានក្រុមជម្រើសជាតិអង់គ្លេស ជាមួយក្លឹបមាន់ខ្នាយមាស ក៏មិនច្បាស់លាស់ដូចគ្នា បន្ទាប់ពីក្លឹបគោលដៅ Man City ទើបតែលោកចេញ Ferran Torres ថ្មីថ្មោងផង។
ចុងក្រោយយើងសូមបង្វែរទៅបញ្ចប់រឿង ការផ្ទេរចេញ Kane នោះគឺត្រង់ យើងទទួលដំណឹងមកថាក្លឹបមេឃខៀវ Man City អាចមានកញ្ចប់ចំណាយល្បាក់ ៩០ ទៅ ១៥០ លានផោន សម្រាប់ទីផ្សារដោះដូរខែមករា។ ងាកមកមើលតម្លៃខ្លួន Kane គឺអាចថ្លៃជាង ៩០ លានផោន ដូច្នេះ បើនិយាយត្រូវរ៉ូវ ការផ្ទេរអាចនឹងសម្រេចទៅបាននៅកំឡុងខែនេះក៏ថាបាន។
ចុះសម្រាប់ការយល់ឃើញរបស់គ្នាយើងវិញ តើវាជារឿងល្អដែរទេ ប្រសិនណា Chelsea ស៊ូខាតលុយជាមួយ Lukaku ហើយព្រមលក់គេមកឲ្យក្រុមលោក Conte រីឯ Spurs ក៏នឹងព្រមលក់ Kane ទៅឲ្យ Man City?