ទីផ្សារដោះដូររដូវរងា នៅតំបន់អឺរ៉ុប នឹងចាប់បើកដំណើរការពីថ្ងៃទី ១ ដល់ថ្ងៃទី ៣១ មករា ដែលមានន័យថា ចន្លោះពេលនេះ បណ្តាក្លឹបទាំងអស់អាចមានសិទ្ធចរចាទិញចូលកីឡាករ ក៏ដូចជាលក់ចេញទៅវិញ នៅចំណែកលើស ដែលគិតថាក្លឹបលែងត្រូវការ។
យ៉ាងណាមិនសុទ្ធតែការផ្ទេរចូលទាំងអស់ គឺជាការសម្រេចចិត្តត្រូវនោះទេ ជាពិសេសគឺការផ្ទេរនាពាក់កណ្តាលរដូវកាលនេះផ្ទាល់តែម្តង ដែលច្រើនតែជាការសម្រេចចិត្តខុស ធៀបនឹងការផ្ទេរនៅរដូវក្តៅ។ ទំព័រ CTS Sports រំឭកពេលវេលា ៤ លើកនៃការផ្ទេរដ៏អាក្រក់បំផុតទាំង ៤ សម្រាប់ទីផ្សារដោះដូរខែមករា៖
៤) Andy Carroll
វិលត្រលប់ទៅឆ្នាំ ២០១១ នៅថ្ងៃចុងក្រោយ មុនបិទទីផ្សារដោះដូររដូវរងា ក្លឹប Liverpool បានសម្រេចចិត្តចាយលុយជិត ៣៥ លានផោន ថ្ពក់យក Andy Carrrol ចេញពីក្លឹប Newcastle United។
ដើមឡើយនៅ Newcastle ទទួលស្គាល់ថា ខ្សែប្រយុទ្ធរូបនេះធ្វើបានល្អ តែលុះដល់ផ្ទេរមកហង្សក្រហម ការបង្ហាញខ្លួនជាង ៤០ ប្រកួត អាចរកបានតែ ៦ គ្រាប់ប៉ុណ្ណោះ ហើយរំលងមួយឆ្នាំបន្ទាប់ក្លឹបក៏សម្រេចដាក់ឲ្យខ្ចីជើងទៅកាន់ West Ham។ ចុះឡើងប្រើប្រាស់វត្តមានគេបានតែ ២ ឆ្នាំ Liverpool ក៏សម្រេចចិត្ត លក់ផ្តាច់កុងត្រាឲ្យទៅក្រុមញញួរ រួចស៊ូខាតជាង ២០ លានផោន។
៣) Alexis Sanchez
ជឿថាអ្នកគាំទ្រ Man Utd ប្រាកដជាចងចាំខ្លាំងបំផុត នៅបរាជ័យរបស់ Sanchez ដែល United បាននាំយកគេមកចូលរួម កាលពីថ្ងៃទី ២២ មករា ឆ្នាំ ២០១៨។ សារនោះ ក្លឹបម្ចាស់ដី Old Trafford បង្កើតការភ្ញាក់ផ្អើល តាមរយៈការចំណាយ លុយជិត ៣០ លានផោន នាំយកខ្សែប្រយុទ្ធឈីលី ចេញពី Arsenal ហើយថែមទាំងប្រគល់អាវលេខ ៨ ឲ្យថែមទៀតផង។
តែយ៉ាងណា វត្តមានរបស់គេជាមួយ United ៤៥ ប្រកួត រកបានតែ ៥ គ្រាប់និង Assist ៩ លើកប៉ុណ្ណោះ។ ក្រោយការអស់ធ្មត់ជាមួយតម្លៃពលកម្មកប់ពពកផង Man Utd ក៏សម្រេចបញ្ចប់កុងត្រា Sanchez ហើយប្រគល់គេឲ្យទៅ Inter Milan និងឈរជើងទល់សព្វថ្ងៃ។
២) Fernando Torres
Torres ជោគជ័យខ្លាំងកាលនៅ Atletico Madrid និង Liverpool ជំនាន់មុនឆ្នាំ ២០១០ លុះដល់ឆ្នាំ ២០១១ នៅថ្ងៃចុងក្រោយបិទទីផ្សារដោះដូរ គេក៏សម្រេចចិត្តផ្ទេរទៅក្លឹបគូប្រជែងគឺតោខៀវ Chelsea។
ការចាយជិត ៥០ លានផោនរបស់ Chelsea ទៅលើខ្សែប្រយុទ្ធអេស្ប៉ាញ មិនទទួលបានផលដូចការគ្រងទុកនោះទេ ដោយ ១៧២ ប្រកួត រកបានតែ ៤៥ គ្រាប់និង Assist ៣៥ លើកប៉ុណ្ណោះ ពោលអន់ជាង ១ ទ្វេជា ២ ធៀបនឹងស្ថិតិកាលនៅហង្ស។ រួចក្រោយមកក៏ដាក់ឲ្យគេខ្ចីជើងទៅ AC Milan ហើយចុះឡើង ដល់ឆ្នាំ ២០១៥ Chelsea ក៏សម្រេចផ្ទេរគេចេញទៅក្លឹបនៅអ៊ីតាលី ជាមួយតម្លៃផ្ទេរថោកមិនគួរឲ្យជឿ ពោលមិនដល់ ១ លានផោនផង។
១) Philippe Coutinho
កាលនៅ Liverpool សម្រាប់ខ្សែបម្រើប្រេស៊ីល គឺ Playmaker ដ៏លេចធ្លោមួយ តែលុះផ្ទេរទៅ Barcelona កាលពីខែមករា ឆ្នាំ ២០១៨ គ្រប់យ៉ាង ក៏ប្រែជាផ្ទុយស្រឡះ។ អាជីពរបស់កីឡាករវ័យ ២៩ ឆ្នាំ ចាប់ផ្តើមធ្លាក់ចុះជាបន្តបន្ទាប់ ហើយតម្លៃខ្លួន ក៏ធ្លាក់សឹង ១ ទ្វេជា ១០ ធៀបនឹងតម្លៃបំបែកកំណត់ត្រា ១៣៥ លានអឺរ៉ូកាលពីផ្ទេរដំបូង។
Coutinho បង្ហាញខ្លួនឲ្យ Barcelona រយៈពេលជាង ៣ ឆ្នាំ រកបានតែ ២៥ គ្រាប់និង Assist ១៤ លើកប៉ុណ្ណោះ ហើយលឺថាក្លឹបចង់លក់ចេញទៅវិញហើយនៅពេលឆាប់ៗខាងមុខ ដ្បិតអីសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៣។ ការផ្ទេរ Coutinho ក៏រាប់បានជាការផ្ទេរខុសធ្ងន់បំផុតមួយ សម្រាប់កីឡាករ PL មក La Liga ប្រចាំទីផ្សារដោះដូរខែមករា៕
ប្រភព៖ បរទេស