រឿងចៃដន្យតែងតែកើតមានឡើងក្នុងពិភពលោកយើងនេះ ជាពិសេសគឺមុខមាត់មនុស្ស ខ្លះមិនបានជាប់សាច់ឈាមអ្វីនឹងគ្នាផង តែបែរជាមានមុខមាត់ស្រដៀងគ្នា ឬខ្លះសឹងតែដូចគ្នាទាំងស្រុង។
បង្វែរមកក្នុងពិភពបាល់ទាត់ ទំព័រ CTS Sports ក៏សូមលើកយកកីឡាករ ៨ រូប មកបង្ហាញ ដែលសម្លឹងមួយភ្លែត ពួកគេប្រៀបដូចជាបងប្អូនភ្លោះ តែធាតុពិត មិនបានកើតចេញពីផ្ទៃម្តាយតែមួយនោះទេ៖
៤) Sacha Kljestan និង Lionel Messi
Messi មានបងប្អូនប្រុសបង្កើត ២ នាក់ ប៉ុន្តែគ្មាននរណាចាប់យកអាជីពជាកីឡាករបាល់ទាត់នោះទេ តែយ៉ាងណាគ្រប់គ្នាភ្ញាក់ផ្អើលខ្លាំង ជាមួយទម្រង់មុខរបស់កីឡាករមួយរូបផ្សេងទៀត គឺ Sacha Kljestan សឹងតែដូចគ្នានឹង Messi បេះដាក់។
Kljestan គេមានវ័យ ៣៦ ឆ្នាំ ជាកីឡាករកូនកាត់អាមេរិក-ស៊ែប៊ី ដែលគ្មានជាប់ទំនាក់ទំនងអ្វីនោះទេ ជាមួយនឹងកីឡាករអាហ្សង់ទីន Leo Messi។ ទម្រង់មុខគឺមើលទៅប្រហែលគ្នា ខុសត្រង់តែពុកចង្ការ និងកាយសម្បទាប៉ុណ្ណោះ។ សព្វថ្ងៃគេកំពុងបម្រើអាជីពឲ្យក្លឹប Los Angeles នៅឯលីគកំពូលអាមេរិក លេងនៅតំណែងបម្រើប្រយុទ្ធ។
៣) David Alaba និង Kingsley Coman
មិនត្រឹមតែមានមុខមាត់ស្រដៀងគ្នាប៉ុណ្ណោះទេ ទៀតសោតក៏ធ្លាប់ជាកីឡាកររួមអាជីពនៅក្លឹប Bayern Munich ជាមួយគ្នាថែមទៀតផង។ រាល់ការប្រកួតម្តងៗ បើពេលជំនាន់ Alaba និង Coman លេងម៉ូតសក់ដូចគ្នាទៀតនោះ គឺសឹងតែអ្នកគាំទ្រមើលមួយភ្លែតចង់ភាំង បែងចែកមិនដាច់ថាមួយណាជាមួយណា។
យ៉ាងណាបច្ចុប្បន្ន ខ្សែការពារ Alaba បានចាកចេញ និងផ្ទេរមកក្លឹបអេស្ប៉ាញ Real Madrid ហើយ ខណៈដែលខ្សែប្រយុទ្ធ Coman នៅបន្តឈរជើងឲ្យក្លឹបយក្សអាល្លឺម៉ង់ដដែល។ បញ្ជាក់ថា Alaba ជាកីឡាករមានសញ្ជាតិអូទ្រីស ស្របពេលដែល Coman មានសញ្ជាតិបារាំង។
២) Marc-Andre ter Stegen និង Bekim Balaj
ម្នាក់ជាអ្នកចាំទី ហើយម្នាក់ទៀតជាខ្សែប្រយុទ្ធ រួចក៏មានសញ្ជាតិខុសគ្នាមេឃដី តែបើក្រុមហ៊ុនណា ចង់ជួលមកថតស្ពតពាណិជ្ជកម្ម មើលមួយភ្លែតប្រហែលអាចបន្លំភ្នែកអ្នកគាំទ្របានថា Balaj គឺជា Stegen។
សម្រាប់អ្នកចាំទីក្លឹប Barcelona មានដើមកំណើតនៅឯប្រទេសអាល្លឺម៉ង់ ស្របពេលដែល Balaj ជាកីឡាករកើតនៅប្រទេសអាល់បានី ហើយសព្វថ្ងៃគេកំពុងបម្រើអាជីពឲ្យក្លឹបរុស្ស៊ី Nizhny Novgorod។
១) Vicente Iborra និង Salvatore Sirigu
Iborra ជាកីឡាករអេស្ប៉ាញ លេងតំណែង ខ្សែបម្រើឲ្យក្លឹប Villarreal ស្របពេលដែល Sirigu ជាអ្នកចាំទីសញ្ជាតិអ៊ីតាលី លេងឲ្យក្លឹប Genoa។ យ៉ាងណាអ្នកទាំងពីរ ដូចគ្នាទាំងមុខមាត់ ទាំងកាយសម្បទា ហើយអាយុក៏ប្រហាក់ប្រហែលគ្នា ពោលម្នាក់មានអាយុ ៣៣ ឆ្នាំ និងម្នាក់ទៀត ៣៤ ឆ្នាំ។
ចំណោមកីឡាករបាល់ទាត់ គេមើលច្រឡំគ្នា គឺរវាង Iborra និង Sirigu នេះហើយ ដែលអ្នកគាំទ្រពិបាកបែងចែកបំផុតថា ជានរណា ប្រសិនមិនមានគ្រោងឈុតនៃក្លឹបរបស់ពួកគេ៕
ប្រភព៖ BeSoccer