លោក Jamie Carragher អតីតកីឡាករក្រុម Liverpool បាននិយាយថាហង្សក្រហមនារដូវកាលនេះនឹងមិនអាចប្រជែងពានរង្វាន់ English Premier League ជាមួយក្រុម Manchester City បានទេ។
ក្នុងការប្រកួតនៅយប់មិញនេះ ក្រុម Liverpool បានត្រឹមស្មើជាមួយក្រុម Chelsea ក្នុងលទ្ធផល ២-២ ប៉ុណ្ណោះ។ ខណៈដែលអ្នកចាត់ការ Jurgen Klopp វិញ បានត្រឹមមើលកូនក្រុមពីក្រៅ ដោយសារតែខ្លួនបានឆ្លងមេរោគកូវីដ១៩ទៅហើយ មិនអាចឈរបញ្ជាលើទីលានបាន។ ដោយលទ្ធផលចែកគ្នាម្នាក់១ពិន្ទុនេះ នឹងធ្វើឱ្យក្រុមទាំងពីរ កាន់តែចាញ់ពិន្ទុក្រុមកំពូលតារាង Man City មែនទែនហើយ។
Carragher បាននិយាយចំពោះរឿងពិន្ទុនេះដែរថា៖ “ខ្ញុំគិតថា Man City នឹងឈ្នះលីគ។ ខ្ញុំមើលមិនឃើញថា Liverpool ឬ Chelsea អាចក្បែរ City បានទេ។ នៅពេលអ្នកចាញ់ពិន្ទុ Man City ដល់ទៅ៣ប្រកួតហើយ នោះការប្រជែងនឹងពិបាកខ្លាំងហើយ។ Man City បច្ចុប្បន្នជាក្រុមគ្រប់គ្រងការប្រកួត ពួកគេមានទាំងព្រម”៕ប្រភព Dailymail
