តារាឆ្នើម Cristiano Ronaldo នៅរយៈពេលប៉ុន្មានសប្ដាហ៍ចុងក្រោយ ជាមួយការលេងឲ្យក្លឹប Man Utd ហាក់ខ្សត់ឱកាសនៃការរកគ្រាប់បាល់ ពោលមិនសូវជាមមាញឹកខ្លាំង ដូចការបង្ហាញខ្លួនដំបូងៗនោះឡើយ។ ជួនពេលដែលកំពុងមានចចាមអារ៉ាមថា តំណែងនៅជម្រើសដំបូងរបស់កីឡាករព័រទុយហ្គាល់ ហាក់មិននឹងន ក៏ស្រាប់តែអ្នកចាត់ការនៃក្លឹបរួមលីគ បានចេញមកនិយាយឥតលាក់លៀម ថាក្លឹបរបស់ខ្លួននឹងបើកទ្វារស្វាគមន៍ជានិច្ច ប្រសិនអនាគតរបស់ Ronaldo និង United ត្រូវឈានដល់ផ្លូវបំបែកនៅពេលខាងមុខ។
នោះគឺអ្នកចាត់ការលោក Bruno Lage នៃក្លឹប Wolverhampton Wanderers ជាក្លឹបកំពុងឈរលេខ ៨ នៅ Premier League ចាញ់ ៦ ពិន្ទុធៀបនឹង Man Utd ដែលឈរលេខរៀងទី ៧។ ជាក់ស្តែងក្រុមទាំងពីរ ក៏នឹងត្រូវជួបគ្នាផងដែរ សម្រាប់ជំនួបជុំទី ១៩ នៅវេលាម៉ោង ១២:៣០ នាទីទាបភ្លឺ ឈានចូលយប់ថ្ងៃអង្គារ ទី ៤ មករា។
មុនឈានដល់ការប្រកួត លោក Bruno ដែលជាបុរសរួមសញ្ជាតិព័រទុយហ្គាល់ ក៏បាននិយាយថា៖ “ប្រសិន Man Utd អត់សប្បាយចិត្តនឹងវត្តមានរបស់ Ronaldo ទេ នោះខ្ញុំអាចធានាកន្លែងនៅទីនេះ សម្រាប់គេបាន ព្រោះយើងមើលទៅ Ronaldo គេនៅតែជាកីឡាករដ៏សំខាន់ ហើយអ្វីដែលគេអាចផ្តល់មកកាន់ក្រុមគឺពិតជាអស្ចារ្យ”។
លោកបន្ថែមទៀតថា៖ “ពេលអ្នកមានកីឡាករដូចជា Ronaldo ដែលគេនៅតែអាចរកបានគ្រាប់បាល់ វាគឺពិតជាពិបាកនឹងជឿណាស់ ថាគេសព្វថ្ងៃមានវ័យ ៣៦ ឆ្នាំ នេះគេនៅបន្តឈរនៅកម្រិតដ៏ខ្ពស់ ដែលបានបង្ហាញចេញមកតាំងពីនៅក្មេងវ័យ ពោលគេគឺជាម៉ាស៊ីន តែងតែចង់រកគ្រាប់បាល់ជានិច្ច ដូច្នេះខ្ញុំគិតថា មិនមែនតែក្រុមខ្ញុំទេ ជារួមគឺក្រុមទាំងអស់ក្នុងលោក សុទ្ធតែប្រាថ្នាចង់បានកីឡាករដូចជា Ronaldo”។
“អ្នកចាត់ការ Man Utd គួរប្រើប្រាស់ម្នាក់នេះ ជំនួស Ronaldo នៅជម្រើសដំបូង” – Merson
មុនឈានដល់ការប្រកួត ទល់ក្លឹប Wolves នៅយប់រំលងអាធ្រាត្រ ឈានចូលថ្ងៃអង្គារ ក្រឡេកមកមើលមតិនៃការយល់ឃើញរបស់អតីតកីឡាករជើងចាស់នៃក្លឹប Arsenal គឺលោក Paul Merson បាននិយាយចំៗថា Cristiano Ronaldo មិនគួរមានឈ្មោះនៅជម្រើសដំបូងនោះទេ ផ្ទុយទៅវិញ គួរតែផ្តល់ឱកាសឲ្យ Edinson Cavani។
យើងមិនច្បាស់ថា ប្រព័ន្ធកីឡាករដែលអ្នកចាត់ការលោក Ralf Rangnick ពេលលេងប៉ះ Wolves នឹងរៀបចេញបែបណាទេ តែ Merson បាននិយាយច្បាស់ថា បើ Cavani លេងជំនួស Ronaldo នៅប្រយុទ្ធកណ្តាល គឺលទ្ធផលនឹងចេញមកល្អជាង។
ប្រាប់ Sportskeeda លោក Merson និយាយ៖ “ប្រព័ន្ធលេងរបស់ Man Utd ខ្ញុំជឿយ៉ាងមុតមាំថា Cristiano Ronaldo គួរតែត្រូវបានដកចេញ ដ្បិតវាមិនងាយនឹងអាចទៅរួច តែជាការពិត Edinson Cavani គេគួរតែជំនួសតំណែងមួយនោះ ហើយអមដោយប្រយុទ្ធស្លាប ដូចជា Jadon Sancho, Marcus Rashford ឬ Mason Greenwood នេះមើលទៅដូចជាមានរឿងអ្វីនៅពីក្រោយនោះ ដែលមិនល្អនោះទេសម្រាប់ពួកគេ”។
គួររំឭកដែរថា កីឡាករវ័យ ៣៦ ឆ្នាំ នៅរដូវកាល ២០២១/២២ ជាមួយ United បង្ហាញខ្លួនសរុប ២០ ប្រកួត រកបាន ១៤ គ្រាប់និង Assist ៣ លើក។ ធៀបនឹង Cavani គេសឹងតែបាត់បង់ឱកាសទាំងស្រុង ពោលបានឈរជើងត្រឹមនាមកីឡាករបម្រុង ហើយទើបរកបាន ២ គ្រាប់ប៉ុណ្ណោះ៕
ប្រភព៖ Sportskeeda