ព្រឹត្តិការណ៍ដណ្តើមពានរង្វាន់ប្រចាំតំបន់អាស៊ាន Suzuki Cup 2020 ទីបំផុត ក៏បានរកឃើញក្រុមឈ្នះជើងឯកកាលពីពេលកន្លងទៅនេះ ដោយក្រុមជម្រើសជាតិថៃ បានយកឈ្នះនៅលទ្ធផលសរុបទាំងពីរជើង ៦-២ ទៅលើក្រុមជម្រើសជាតិឥណ្ឌូណេស៊ី។
ជាមួយជ័យជម្នះសារនេះ ក៏មិនខុសពីសារមុនៗ ដោយអ្នកគាំទ្រនៅតែស្ងើចសរសើរមិនដាច់ពីមាត់ ដល់កីឡាករមាឌល្អិត ចិត្តដំរី គឺ Chanathip Songkrasin ឬជាប់រហស្សនាម “Messi Jay” ដែលបានបង្ហាញទម្រង់លេងយ៉ាងល្អ តាំងពីវគ្គដំបូង មកទល់វគ្គចុងក្រោយ។ ក្រៅពីជាចំណែកជួយដំរីចម្បាំងថៃ ក្លាយជាម្ចាស់ជើងឯកលើកទី ៦ បើក្រឡេកទៅមើលសមិទ្ធផលធំៗ ២ ផ្សេងទៀត ដែល Chanathip សម្រេចបាន គឺមានដូចតទៅ៖
១) ឈ្នះនាមជា Top Scorer
នៅព្រឹត្តិការណ៍ AFF Championship លើកទី ១៣ សម្រាប់ក្រុមជម្រើសជាតិថៃ រកបានគ្រាប់បាល់សរុបចំនួន ១៨ គ្រាប់ ពោលចាញ់តែឥណ្ឌូណេស៊ីជាជើងឯករង ដែលមាន ២០ គ្រាប់។ យ៉ាងណាក្រឡេកទៅតំណែង Top Scorer ឈ្មោះកីឡាកររកបានគ្រាប់បាល់ច្រើនបំផុត គឺមានអ្នកលេខ ១ ដល់ទៅ ៤ រូបឯណោះ ហើយមានកីឡាករថៃ ដល់ទៅ ២ រូប។ ក្នុងនោះរួមមាន៖
១= ខ្សែប្រយុទ្ធហ្វីលីពីន Bienvenido Maranon បង្ហាញខ្លួន ៤ ប្រកួត រកបាន ៤ គ្រាប់
១= ខ្សែប្រយុទ្ធម៉ាឡេស៊ី Safawi Rasid បង្ហាញខ្លួន ៤ ប្រកួត រកបាន ៤ គ្រាប់
១= ខ្សែបម្រើប្រយុទ្ធថៃ Chanathip Songkrasin បង្ហាញខ្លួន ៦ ប្រកួត រកបាន ៤ គ្រាប់
១= ខ្សែប្រយុទ្ធថៃ Teerasil Dangda បង្ហាញខ្លួន ៧ ប្រកួត រកបាន ៤ គ្រាប់
ជាមួយប្រាក់រង្វាន់ សម្រាប់ម្ចាស់ពានស្បែកជើងមាសប្រចាំព្រឹត្តិការណ៍ គឺទទួលបានប្រាក់លើកទឹកចិត្ត ២ ៥០០ ដុល្លារ ក្នុងម្នាក់។
២) ជាកីឡាករឈ្នះ MVP ច្រើនបំផុតក្នុងប្រវត្តិសាស្ត្រ
ក្រៅពីឈ្មោះជា Top Scorer សម្រាប់ព្រឹត្តិការណ៍សារនេះ កីឡាករដែលមានកម្ពស់ទាប ១,៦៣ ម៉ែត្រ របស់ថៃ ក៏បានក្លាយឈ្មោះជាកីឡាករល្អបំផុត ឬជាប់ឈ្មោះ MVP ផងដែរ។ នេះមិនមែនជាលើកដំបូងទេ ផ្ទុយទៅវិញគឺវាជាលើកទី ៣ ហើយ ដោយកន្លងមក ធ្លាប់ឈ្នះកាលពីឆ្នាំ ២០១៤ និង ២០១៦។
នេះក៏បានរុញឲ្យ “Messi Jay” ជាប់ឈ្មោះជាកីឡាករដំបូងក្នុងប្រវត្តិសាស្ត្រនៅពានមានអាយុកាល ២៦ ឆ្នាំ ដែលអាចឈ្នះ MVP ដល់ទៅ ៣ លើក។
គួរបញ្ជាក់ដែរថា ខ្សែបម្រើប្រយុទ្ធវ័យ ២៨ ឆ្នាំខាងលើ បានបង្ហាញខ្លួនជាលើកដំបូងឲ្យជម្រើសជាតិថៃ នៅថ្ងៃទី ៣០ វិច្ឆិកា ឆ្នាំ ២០១២។ សរុបស្ថិតិការបង្ហាញខ្លួន ៥៨ ប្រកួត គេរកបាន ១២ គ្រាប់និង Assist ៦ លើក។
វត្តមានរបស់គេ គឺពិតជាសំខាន់ ជាក់ស្ដែងដូចនៅព្រឹត្តិការណ៍ដណ្ដើមពានមួយនេះ ដែលស្ថិតក្រោមការរៀបចំដោយសមាគមបាល់ទាត់ប្រចាំតំបន់អាស៊ីអាគ្នេយ៍ហៅកាត់ AFF គឺក្រុមជម្រើសជាតិថៃ ជាក្រុមដែលឈ្នះជើងឯកច្រើនជាងគេ ពោលដល់ទៅ ៦ សម័យកាល។ ដោយឡែកការលេងឲ្យក្លឹប Chanathip កំពុងឈរជើងឲ្យក្លឹបនៅឯលីគកំពូលជប៉ុន Hokkaido Consadole Sapporo ជាមួយនឹងកំណត់ត្រាតម្លៃផ្ទេរខ្ពស់បំផុតប្រចាំបាល់ទាត់ថៃ គឺជាង ២,៧ លានដុល្លារ៕
ប្រភព៖ បរទេស