ខ្សែប្រយុទ្ធ Romelu Lukaku បាននិយាយថាខ្លួនចង់ត្រលប់ទៅលេងនៅក្លឹប Inter Milan វិញហើយ ក្រោយពីទើបចូលរួមជាមួយក្រុមតោខៀវ Chelsea បានត្រឹម៤ខែប៉ុណ្ណោះ។
ខ្សែប្រយុទ្ធបែលហ្សិកខាងលើរកបានគ្រាប់បាល់២ប្រកួតជាប់គ្នាមកហើយ ប៉ុន្តែរូបគេហាក់មិនទាន់សប្បាយចិត្តជាមួយក្រុម Chelsea នោះទេ។ ខណៈដែលវត្តមានរបស់គេមកអង់គ្លេសវិញនេះទៀតសោត ក៏មានបញ្ហាច្រើនជាពិសេសរបួសផង និងកូវីដ១៩ផង។ កត្ដានេះហើយ ទើបបានជាថ្មីៗនេះ Lukaku និយាយចេញពីមាត់តែម្ដងថាចង់ត្រលប់ទៅ Inter Milan វិញ។
អតីតកីឡាករ Man Utd ខាងលើបានប្រាប់ទៅ Sky Sport Italy ថា៖ “កាយសម្បទាខ្ញុំមិនអីទេ ប៉ុន្តែខ្ញុំមិនសប្បាយចិត្តជាមួយស្ថានភាពនៅ Chelsea ។ Tuchel បានជ្រើសលេងក្បួនផ្សេង។ ខ្ញុំមិនសប្បាយចិត្ត ហើយវាធម្មតាទេ។ រឿងតែមួយដែលខ្ញុំអាចធ្វើបាន គឺមិនបោះបង់ និងបន្ដធ្វើជាកីឡាករអាជីព”៕ប្រភព Marca
