ឆ្លងកាត់រយៈពេលជាង ១ ឆ្នាំពេញនេះ ក្នុងវិស័យបាល់ទាត់ តើអ្នកគិតថា ក្លឹបណាទៅ ដែលទទួលរងបរាជ័យតិចលើកបំផុត? នេះបើយើងរាប់តែនៅលីគកំពូលទាំង ៥ ប្រចាំតំបន់អឺរ៉ុប ហើយគិតតែការប្រកួតក្នុងលីគ សម្រាប់ចម្លើយ គឺគ្មានឈ្មោះក្លឹបនៅអង់គ្លេសនោះទេ នៅចំណោមឈ្មោះក្លឹបទាំង ៤។
បើតាមរបាយការណ៍ពី Opta យើងធ្វើការបង្ហាញនៅក្លឹបបាល់ទាត់ ៤ ដែលស្គាល់ពាក្យថា “ចាញ់” តិចបំផុតនៅរយៈពេល ១២ ខែ ក្នុងឆ្នាំ ២០២១៖
៤) Bayern Munich
រាប់ចាប់ពីថ្ងៃទី ១ មករា មកទល់ចុងខែធ្នូ គឺក្លឹបដឹកនាំដោយអ្នកចាត់ការលោក Julian Nagelsmann បានឆ្លងកាត់ការប្រកួតសរុប ៣៧ លើក ហើយក្នុងនោះ គឺស្គាល់បរាជ័យតែ ៥ លើកប៉ុណ្ណោះ។
ការចាញ់របស់ Bayern Munich នៅក្នុងលីគ Bundesliga មានដូចជា ការចាញ់ ២-៣ ទល់ Borussia Mongchengladbach, ១-២ ទល់ Frankfurt, ១-២ ទល់ Mainz 05 ហើយមករដូវកាលថ្មី ក៏ចាញ់ Frankfurt ២-១ សារជាថ្មី និងលើកចុងក្រោយទើបតែចាញ់ FC Augbsburg ២-១ ដូចគ្នា កាលពីពាក់កណ្តាលខែវិច្ឆិកា។ យ៉ាងណាចំណាត់ថ្នាក់បច្ចុប្បន្ននៅលីគកំពូលអាល្លឺម៉ង់ សម្រាប់ Bayern គឺឈរលេខរៀងទី ១ មាន ៤៣ ពិន្ទុ នាំមុខដាច់គម្លាតធៀបនឹង Dortmund ដល់ទៅ ៩ ពិន្ទុ។
៣) Paris Saint-Germain
ឆ្លងកាត់ ៣៩ ប្រកួត សម្រាប់ក្លឹបសេដ្ឋីបារាំង PSG រយៈពេលមួយឆ្នាំពេញ ពួកគេស្គាល់បរាជ័យ ៥ លើកដូចទៅនឹង Bayern ដែរ។
ការចាញ់លើកដំបូងនៅឆ្នាំ ២០២១ គឺនាចុងខែមករា ដែលលេងប៉ះ Lorient ហើយចាញ់ ៣-២, ការចាញ់ AS Monaco ២-០, ការចាញ់ Nantes ១-២ និងការចាញ់ក្រុមឈ្នះជើងឯក Lille ១-០។ លុះចូលមកដល់រដូវកាលថ្មី ២០២១/២២ ឃើញថា ក្លឹបដឹកនាំដោយលោក Mauricio Pochettino ហាក់ធ្វើបានល្អជាងមុនច្រើន ដោយទើបតែចាញ់ ១ ប្រកួតប៉ុណ្ណោះ គឺកាលប៉ះ Rennes ចាញ់ ២-០។ យ៉ាងណាបច្ចុប្បន្ន PSG កំពុងឈរអណ្តែតនៅកំពូលតារាង នាំមុខក្រុមលេខ ២ Nice ដល់ទៅ ១៣ ពិន្ទុ។
២) Inter Milan
ឆ្លងកាត់ ៤២ ប្រកួត សម្រាប់ក្លឹបនៅអ៊ីតាលី ដែលលេងចាញ់តិចបំផុត គឺជា Inter Milan ដែលស្គាល់បរាជ័យតែ ៣ លើកប៉ុណ្ណោះ។ មាន ២ លើកស្ថិតនៅរដូវកាលចាស់ ហើយ ១ លើកចូលមកដល់រដូវកាលថ្មី។
ការចាញ់លើកដំបូងនៅឆ្នាំ ២០២១ សម្រាប់ក្លឹបមានមូលដ្ឋានក្នុងទីក្រុង Milan ប្រទេសអ៊ីតាលី គឺចាញ់ Sampdoria ២-១ ហើយរហូតមកដល់កៀកពាក់កណ្តាលឆ្នាំ ទើបលេងចាញ់ Juventus ៣-២ មុនបិទរដូវកាល។ ចូលមកដល់រដូវកាលថ្មី កាលប៉ះ Lazio នាខែតុលាកន្លងទៅ ក៏ Inter Milan លេងចាញ់ផងដែរ ក្រោមលទ្ធផល ៣-១ យ៉ាងណាជោគវាសនារបស់ពួកគេ ក៏អណ្តែតដូចតែក្រុម ២ ទៀតនោះគឺកំពុងនាំមុខ នៅកំពូលតារាង Serie A មាន ៤៦ ពិន្ទុ មានគម្លាត ៤ ពិន្ទុធៀបនឹងក្លឹបរួមទីក្រុង AC Milan។
១) Real Madrid
នេះគឺជាក្លឹបដែលស្គាល់ពាក្យថា “ចាញ់” តិចជាងគេបំផុតប្រចាំឆ្នាំ ២០២១ ដោយ Real Madrid លេង ៤១ ប្រកួត ពួកគេធ្លាប់បាត់បង់ ៣ ពិន្ទុពេញ តែ ២ លើកប៉ុណ្ណោះ។ នោះគឺការចាញ់ Levante ២-១ កាលពីចុងខែមករា និងការចាញ់ Espanyol ២-១ ដូចគ្នា កាលពីខែតុលា។
ក្លឹបដឹកនាំដោយអ្នកចាត់ការលោក Carlo Ancelotti រាប់ថាធ្វើបានល្អខ្លាំង ដោយកំពុងនាំមុខ ក្រុមលេខ ២ Sevilla ដល់ទៅ ៨ ពិន្ទុ នៅតារាង La Liga៕ ប្រភព៖ Opta