ទីផ្សារដោះដូររដូវរងា ឆ្នាំ ២០២២ គឺនឹងចាប់បើកដំណើរការនៅថ្ងៃទី ១ មករានេះតទៅ ហើយគេជឿថា ក្លឹបធំៗជាច្រើននៅអឺរ៉ុប នឹងមានភាពសកម្មខ្លាំង ទាំងលើការលក់ចេញ និងទិញចូលកីឡាករ។ ជាពិសេសគឺក្លឹប ដែលទើបតែចាត់តាំងអ្នកចាត់ការថ្មី ព្រោះជាធម្មតាទេ ថ្នាក់លើក្លឹបនឹងទម្លាក់កញ្ចប់លុយមួយចំនួន ដើម្បីអនុញ្ញាតឲ្យពួកគេ អាចលៃលកនាំយកកីឡាករ មកបំពេញនូវចន្លោះប្រហោងរបស់ក្លឹប។
ជាក់ស្តែងដូចជា Man Utd ដែលមានអ្នកចាត់ការជាលោក Ralf Rangnick ក៏ទំនងជានឹងលក់ចេញកីឡាករច្រើនផងដែរ នៅចន្លោះខែមករា រីឯការនាំយក ក៏លេចលឺថាមានផ្សារភ្ជាប់ទៅនឹងគោលដៅធំៗមួយចំនួនដូចគ្នា។ យ៉ាងណាក្នុងអត្ថបទនេះ ទំព័រ CTS Sports សូមលើកយកលេខអាវទំនេរ ៥ នៅក្លឹបបិសាចក្រហម ដែលខ្លះទំនេរច្រើនឆ្នាំហើយ ដូច្នេះថាមិនត្រូវ អាចនឹងមានម្ចាស់ថ្មីមកគ្រោងនៅពេលឆាប់ៗខាងមុខ៖
អាវលេខ ១២
លេខអាវនេះ អ្នកប្រើប្រាស់ចុងក្រោយបង្អស់នៅ United គឺខ្សែការពារ Chris Smalling មុនពេលគេចាកចេញ ទៅកាន់ក្លឹប AS Roma កាលពីឆ្នាំ ២០២០។ យ៉ាងណាជារួម អាវលេខ ១២ ក៏ធ្លាប់ជាអាវរបស់អតីតវីរបុរសឆ្នើមមួយចំនួន ដូចជា Ray Wilkins, Sir Bobby Charlton, Steve Bruce និង Paul Scholes ជាដើម។ ដូច្នេះហើយ លេខអាវមួយនេះ ក៏រាប់បានជាកត្តាសំខាន់ អាចអូសទាញចិត្តកីឡាករចំណូលថ្មីក៏ថាបាន។
អាវលេខ ១៥
អ្នកប្រើប្រាស់លេខអាវនេះចុងក្រោយបង្អស់ គឺ Nemanja Vidic ដែលបានចែកផ្លូវពី Man Utd នៅឆ្នាំ ២០១៤។ យ៉ាងណាត្រលប់ទៅអតីតកាល កីឡាករកំពូលៗឯទៀតដូចជា Scholes, David Beckham, Gary Neville និង Nicky Butt ក៏ធ្លាប់ពាក់វាដូចគ្នា។
អាវលេខ ២៤
Timothy Fosu-Mensah គឺជាអ្នកប្រើប្រាស់អាវលេខ ២៤ នៅ Man Utd ចុងក្រោយគេបង្អស់ ដោយចាប់ប្រើកាលពី ឆ្នាំ ២០១៦ ហើយព្យួរលេខអាវនេះចោលទល់សព្វថ្ងៃ ក្រោយគេផ្ទេរទៅក្លឹប Bayer Leverkusen កាលពីរដូវរងា។
យ៉ាងណាអាវលេខ ២៤ ក៏ធ្លាប់ជាលេខអាវដែល Scholes និង Beckham បានប្រើប្រាស់ដូចគ្នា ក្រៅពីលេខដែលរៀបរាប់ខាងលើ រួមទាំងអតីតខ្សែបម្រើឆ្នើម Darren Fletcher ផងដែរ។
អាវលេខ ២៨
ក៏ធ្លាប់មានខ្សែបម្រើប្រេស៊ីល Anderson និងខ្សែការពារអេស្ប៉ាញ Gerard Pique ពាក់វាដូចគ្នា កាលនៅឈរជើងឲ្យបិសាចក្រហម។
អាវលេខ ៣២
យើងជឿថា អ្នកគាំទ្រកាន់ឆ្នាំរបស់ United គ្រាន់តែនិយាយលេខ ៣២ ពិតណាស់ ប្រាកដជានឹកដល់អតីតខ្សែប្រយុទ្ធ Carlos Tevez មុនគេបង្អស់។ ដូច្នេះយុវជនជំនាន់ក្រោយ ការដែលអាចមកប្រើអាវលេខ ៣២ ក៏រាប់ថាជាកិត្តិយសមួយផងដែរ ព្រោះបើយើងក្រឡេកទៅមើលសមិទ្ធផលដែលអតីតកីឡាករអាហ្សង់ទីនសម្រេចបាន កាលនៅក្លឹបអង់គ្លេស គឺធ្លាប់បង្ហាញខ្លួន ៩៩ ប្រកួត រកបាន ៣៤ គ្រាប់និង Assist ១១ លើក ហើយក៏ជាអ្នកចូលរួមចំណែក ជួយក្រុមលើកពាន Champions League ថែមទៀតផងដែរ៕
ប្រភព៖ បរទេស