Hugo Lloris អាចនឹងចាកចេញនៅទីផ្សារដោះដូរខែមករាខាងមុខ ព្រោះអីកុងត្រារបស់គេត្រូវផុតនៅចុងខែមិថុនា ឆ្នាំ ២០២២ ហើយ ដូច្នេះក្លឹបទំនងជាលក់យកលុយមកវិញខ្លះ ជាជាងទុកដល់អស់តម្លៃខ្លួន។
បើតាមសារព័ត៌មាន Manchester Evening News ចុះផ្សាយថា អ្នកចាត់ការសញ្ជាតិអ៊ីតាលី លោក Antonio Conte របស់ក្លឹប Spurs ក៏បានមើលឃើញគោលដៅថ្មីរបស់ខ្លួនហើយដែរ នោះគឺជាកីឡាកររួមលីគនៃក្លឹបគូប្រជែង Dean Henderson ឈរជើងឲ្យក្លឹប Man Utd។
ក៏ដោយសារមើលឃើញថា កីឡាករអង់គ្លេសគេនឹងមិនអាចទទួលបានឱកាសលេងដៃទីមួយ យកឈ្នះ David de Gea បានឡើយ ដូច្នេះជឿថាសាមីខ្លួនក៏គិតចង់ចាកចេញនៅពេលខាងមុខដែរ។ ក្រោមការដឹកនាំរបស់លោក Ralf Rangnick លោកក៏ប្រហែលជានឹងមិនឃាត់ការចង់ចាកចេញនោះដែរ ប្រសិន Henderson មានក្លឹបថ្មី ព្រមមកចរចាត្រូវរ៉ូវនៅតម្លៃសមស្របណាមួយ។
សម្រាប់អ្នកចាំទីវ័យ ២៤ ឆ្នាំរបស់ Man Utd សេសសល់សុពលភាពកុងត្រាដល់ចុងខែមិថុនា ឆ្នាំ ២០២៥ ដូច្នេះហាងឆេងតម្លៃខ្លួនរបស់គេ អាចថ្លៃល្បាក់ចន្លោះ ១៥ ទៅ ២០ លានផោន។ នៅរដូវកាលនេះ គេឈរជើងបានតែ ៣៣៨ នាទីប៉ុណ្ណោះ ខណៈនៅ Premier League គឺមិនទាន់ទទួលបានឱកាសសោះ៕
ប្រភព៖ Manchester Evening News