តារាឆ្នើមក្លឹប Real Madrid គឺ Marcelo ត្រូវបានគេរាយការណ៍ថា កំពុងគិតចង់ចូលនិវត្តពីអាជីពជាកីឡាករ ប្រសិនណាការចរចាកុងត្រាថ្មីនៅពេលខាងមុខ មិនអាចទទួលបានជោគជ័យ។ ខ្សែការពារស្លាបសញ្ជាតិប្រេស៊ីល សេសសល់សុពលភាពកុងត្រាដល់ចុងខែមិថុនា ឆ្នាំ ២០២២ តែមិនលឺដំណឹងថា នឹងចង់ផ្ទេរទៅក្លឹបថ្មីណាមួយនៅឡើយ។
យ៉ាងណាពេលចុងក្រោយ តំណែងរបស់គេលើទីលាន ក៏មិនអាចបង្ហាញជាប់លាប់ដូចមុនទៀតដែរ ជាពិសេសក្រោយពេលមាន Ferland Mendy និង David Alaba។ បើតាមសារព័ត៌មាន Marca បានចុះផ្សាយថា បុរសវ័យ ៣៣ ឆ្នាំ នឹងសម្រេចចិត្តព្យួរនិវត្តតែម្តង ប្រសិនណាខាង Los Blancos មិនអាចព្រមព្រៀងការបន្តកុងត្រាថ្មីសម្រាប់គេនៅពេលខាងមុខ។
គួរបញ្ជាក់ថា Marcelo គេរាប់បានជាកីឡាករកាន់ឆ្នាំ ឈរជើងយូរជាងគេបង្អស់ហើយប្រចាំក្លឹប ដោយបានចាកចេញពីក្លឹប Fluminense មករួមជើងនៅ Real Madrid តាំងពីខែមករា ឆ្នាំ ២០០៧។ សរុបការបង្ហាញខ្លួន ៥៣៣ ប្រកួត គេរកបាន ៣៨ គ្រាប់និង Assist ១០១ លើកឲ្យក្លឹប៕