ក្នុងទីក្រុង Calangute រដ្ឋ Goa ប្រទេសឥណ្ឌា ថ្មីៗនេះបានប្រកាសបង្ហាញជាផ្លូវការ នូវរូបសំណាកតារាបាល់ទាត់ឆ្នើម Cristiano Ronaldo ដែលនេះជារូបសំណាកទី ១ រំលេចវត្តមានក្នុងផ្ទៃប្រទេសមួយនេះ។
តាមការចុះផ្សាយពីសារព័ត៌មានក្រៅស្រុក វាមានទម្ងន់ប្រមាណ ៤១០ គីឡូក្រាម ហើយសង់ឡើងក្នុងគោលដៅ ចូលរួមផ្សព្វផ្សាយឲ្យយុវជនចូលរួមលេងកីឡាបាល់ទាត់។ តាមការបញ្ជាក់ពីរដ្ឋមន្ត្រីនៃរដ្ឋ Goa លោក Michael Lobo បានប្រាប់ ANI ដូច្នោះថា៖ “នេះគឺជារូបសំណាកដំបូងរបស់ Cristiano Ronaldo ដែលមានវត្តមាននៅទឹកដីឥណ្ឌា ហើយនេះគ្មានអ្វីក្រៅពីចង់បំផុសចិត្តយុវជនរបស់យើង ទាំងបុរសនិងស្រ្តី អំពីការចង់បោះជំហានទៅក្នុងអាជីពបាល់ទាត់ រួចរាល់ពេលយើងមក Selfie យើងមកទីនេះ បានឃើញរូបសំណាក គឺពិតជានឹងអាចបំផុសចិត្តរបស់យើងបាន”។
ប្រភពបានឲ្យដឹងថា រូបសំណាកនេះ ចាយពេលជាង ៣ ឆ្នាំក្នុងការសម្រេចសាងសង់ ហើយខ្ទង់ចំណាយគឺចាយអស់ជិត ២ មុឺនដុល្លារ។ តាមពិតទៅ វាត្រូវប្រកាសលឿនជាងនេះ តែដោយសារការរាតត្បាតជំងឺ COVID-19 ទើបមានការអូសបន្លាយពេល៕
ប្រភព៖ ANI