ក្លឹបមេឃខៀវ Manchester City បានប្រកាសលក់ចេញ Ferran Torres ទៅឲ្យក្លឹប Barcelona ជាផ្លូវការ ហើយឥឡូវលឺថាលុយដែលទទួលបាន គឺទំនងជាតម្រង់គោលដៅ ទៅចាត់ចែងយកកីឡាករឆ្នើមពីលីគកំពូលអាល្លឺម៉ង់។
បើតាមសារព័ត៌មាន Sport ចុះផ្សាយថា ក្រុមដឹកនាំដោយលោក Pep Guardiola ជាអ្នកចាត់ការ ហាក់ចង់ប្រជែងយកឈ្នះឲ្យបានជាមួយនឹងក្លឹបធំៗនៅអឺរ៉ុប លើការនាំយក Erling Haaland មកកាន់ទឹកដី Etihad។ គេនឹងមានតម្លៃផ្តាច់កុងត្រា ៦៤ លានផោន នៅឆ្នាំក្រោយ តែក្លឹបអាចចាត់ចែងចរចាជាបណ្តើរៗបាន នៅតម្លៃសមរម្យណាមួយ ប្រសិនជាត្រូវការចាំបាច់។
មានក្លឹបយក្សដូចជា Chelsea, Man Utd, PSG, Real Madrid និង Barcelona សុទ្ធតែត្រូវបានគេដឹងថា ចាប់អារម្មណ៍មកលើកីឡាករន័រវេស។ ជាក់ស្តែង City បើយកបាន Haaland គឺល្អ ព្រោះសព្វថ្ងៃពួកគេមិនទាន់រកបានខ្សែប្រយុទ្ធដ៏មុតស្រួចមួយនៅឡើយ ក្រោយពី Sergio Aguero ចាកចេញទៅ។ ស្ថិតិជារួមរបស់កីឡាករវ័យ ២១ ឆ្នាំនៅក្លឹប Dortmund ត្រឹមការបង្ហាញខ្លួន ៧៥ ប្រកួត គេរកបាន ៧៦ គ្រាប់និង Assist ២០ លើក៕
ប្រភព៖ Sport