Lorenzo Insigne ឬជាប់រហស្សនាមជា ‘Messi អ៊ីតាលី’ ត្រូវបានគេរាយការណ៍ថា កំពុងព្រមព្រៀងលក្ខខណ្ឌផ្ទេរទៅកាន់ក្លឹបថ្មី នៅឯក្របខ័ណ្ឌ MLS នោះគឺ Toronto FC ហើយការបង្ហាញខ្លួន នឹងធ្វើឡើងនៅរដូវក្តៅ ឆ្នាំ ២០២២ ខាងមុខ។
តាមការឲ្យដឹងពីអ្នករាយការណ៍លោក Michael Singh បានបញ្ជាក់លើ Twitter ថា កិច្ចព្រមព្រៀងគឺឈានដល់ការសម្រេចហើយ ដោយកីឡាករវ័យ ៣០ ឆ្នាំ ជាប្រធានក្រុមនៃក្លឹប Napoli នឹងទៅចូលរួមជាមួយ Toronto ក្រោយពេលកុងត្រាគេអស់សុពលភាពនៅចុងខែមិថុនា ឆ្នាំក្រោយ។
បញ្ជាក់ថា Toronto FC ជាក្លឹបមានមូលដ្ឋានក្នុងប្រទេសកាណាដា តែបច្ចុប្បន្នកំពុងមានឈ្មោះលេងនៅក្របខ័ណ្ឌលំដាប់ទី ១ របស់អាមេរិក MLS ហើយឈរចំណាត់ថ្នាក់ទី ១៣។ ដោយឡែក Insigne នេះអាចថាជាក្លឹបចុងក្រោយរបស់គេក៏ថាបាន មុននឹងសម្រេចចិត្តចូលនិវត្ត។ ទៅមើលតម្លៃពលកម្មលើកុងត្រារយៈពេល ៥ ឆ្នាំ ស្លាបប្រយុទ្ធជំនាញខាងល្បឿន និងការញាក់បាល់ គឺអាចរកបាន ១៣ លានដុល្លារក្នុងមួយរដូវកាល បូកនឹងប្រាក់ឧបត្ថម្ភផ្សេងៗ ៥ លានផោនទៀត៕
ប្រភព៖ Mlssoccer