Kylian Mbappe បានបញ្ជាក់ច្បាស់ហើយថារូបគេនឹងមិនចូលរួមជាមួយក្រុម Real Madrid នៅខែមករាឆ្នាំ២០២២ខាងមុខនេះទេ ដោយផ្ដោត១០០%ទៅលើក្រុម PSG។
បើទោះជាមិនយល់ព្រមបន្ដកុងត្រាថ្មីនៅបារាំងមែន ប៉ុន្តែខ្សែប្រយុទ្ធ Mbappe ក៏មិនចង់ចាកចេញពីក្រុម PSG នៅខែមករាខាងមុខនេះដែរ។ រូបគេនឹងប្រឹងប្រែងនៅឆ្នាំចុងក្រោយនៃកុងត្រានេះ ដើម្បីធ្វើយ៉ាងណាឈ្នះពានរង្វាន់តាមអ្វីដែលក្រុមចង់បាន ជាពិសេសនោះគឺ UEFA Champions League ដែលជាក្ដីស្រមៃ។ ខណៈដែលដំណឹងថាចង់ទៅលេងនៅក្រុម Real Madrid នៅខែមករាក៏មិនពិតដែរ។
សាមីខ្លួនបានចេញមុខមកនិយាយថា៖ “ទេ ខែមករាមិនអាចទេ។ ខ្ញុំសប្បាយចិត្តនៅ PSG ហើយខ្ញុំនឹងបញ្ចប់រដូវកាលនេះនៅទីនេះ ១០០%។ ខ្ញុំនឹងផ្ដល់គ្រប់យ៉ាងដែលខ្ញុំអាចធ្វើបាន ដើម្បីជួយក្រុមឈ្នះ Champions League, League និង Cup ។ ខ្ញុំគិតថាខ្ញុំគួរតែឈ្នះពានធំជាមួយ PSG។ ខ្ញុំចង់ឈ្នះគ្រប់យ៉ាងនៅរដូវកាលនេះ”៕ ប្រភព៖ MARCA