ក្លឹបបារាំង Paris Saint-Germain ត្រូវបានគេរាយការណ៍ថា កាន់តែកៀកនឹងឈានដល់កិច្ចព្រមព្រៀងបន្តកុងត្រាថ្មី រវាងភាគីកីឡាករ Marquinhos នៅខែមករាខាងមុខ ពោលបន្តពីលើសុពលភាពកុងត្រាចាស់ដល់ទៅ ៣ ឆ្នាំ។
ប្រធានក្រុម ដែលមានសញ្ជាតិប្រេស៊ីល គេបានដើរតួយ៉ាងសំខាន់ ក្រោយ Thiago Silva ចាកចេញទៅ រួចក៏រាប់ថាជាចំណែកខ្វះពុំបាន ក្រោមការដឹកនាំរបស់លោក Mauricio Pochettino រដូវកាលនេះផងដែរ។ សុពលភាពកុងត្រាចាស់ គឺត្រូវផុតនៅចុងរដូវកាល ២០២៣-២៤ ដែលនេះជាកុងត្រាគេបានចុះហត្ថលេខាកាលពីខែមករា ឆ្នាំ ២០២០។
បើតាមសារព័ត៌មាន Fichajes ចុះផ្សាយថា PSG កំពុងចាត់ចែងលើរឿងនេះហើយ ដោយចង់ឲ្យបុរសវ័យ ២៧ ឆ្នាំបន្តកុងត្រាដល់រដូវក្តៅ ឆ្នាំ ២០២៦ ឬ ២០២៧ ល្មមនឹងគេឈានចូលអាយុ ៣២ ឬ ៣៣ ឆ្នាំ។ ប្រភពបន្តថា ភាគីសាមីខ្លួនផ្ទាល់ក៏រីករាយជាមួយក្លឹបមានមូលដ្ឋានក្នុងទីក្រុងប៉ារីសដូចគ្នា អ៊ីចឹងភាគរយនៃការប្រកាសកុងត្រាថ្មី គឺអាចនឹងកើតមានច្រើន៕
ប្រភព៖ Fichajes