នៅវេលាទាបភ្លឺ ឈានចូលថ្ងៃទី ២៧ ធ្នូ លើទំព័រ CTS Sports នឹងមានការផ្សាយផ្ទាល់នូវជំនួប Aston Villa-Chelsea ដែលជាការប្រកួតជុំទី ១៩ នៅក្របខ័ណ្ឌ Premier League។ នៅរាត្រីនេះ ខាងក្រុមម្ចាស់ផ្ទះនឹងមិនមានវត្តមាន អ្នកចាត់ការលោក Steven Gerrard ចាំឈរបញ្ជានោះទេ ក្រោយពីតេស្តឃើញមានផ្ទុកជំងឺ COVID-19។
យ៉ាងណាក្រុមក៏នៅទេមានមហិច្ឆតាក្នុងការគាស់ស្ថិតិដ៏ល្អមួយ ខកខានធ្វើបានតាំងពីឆ្នាំ ២០០៤ នោះគឺការឈ្នះក្នុងទឹកដីខ្លួនឯង ពីរប្រកួតជាប់គ្នា។ ត្រលប់ទៅ ១៧ ឆ្នាំមុន Aston Villa ធ្លាប់ប៉ះ Chelsea ដោយយកឈ្នះ ២-១ កាលពីខែមេសា ឆ្នាំ ២០០៣ ហើយរំលងទៅមួយឆ្នាំបន្ទាប់នៅ PL ដដែលពួកគេយកឈ្នះ ៣-២ ថែមទៀត។
ក្រោយៗមកគឺខកខានធ្វើបាន បន្ទាប់ពីស្គាល់បរាជ័យច្រើនជាងជ័យជម្នះ តែយ៉ាងណាសារនេះ ឱកាសបានកើតមានសារជាថ្មី ព្រោះអីកាលពីខែឧសភា ឆ្នាំ ២០២១ នៅដី Villa គឺក្រុមយកឈ្នះ ២-១ ឥឡូវមកប៉ះគ្នាសារនេះម្តងទៀត ប្រសិនយកឈ្នះ នៅលទ្ធផលណាមួយក្តី គឺស្មើនឹងគាស់កំណត់ត្រាចាស់បានហើយ។ បញ្ជាក់ថា ក្រុមដឹកនាំដោយលោក Steven Gerrard នៅរដូវកាលនេះ កំពុងឈរនៅលេខរៀងទី ១០ បន្ទាប់ពី ឈ្នះ ៧ ស្មើ ១ និងចាញ់ ៩ មាន ២២ ពិន្ទុ៕
ប្រភព៖ Sportsmole