Cristiano Ronaldo ចាកចេញពីក្លឹប Juventus រយៈពេលជិត ៤ ខែមកហើយ ប៉ុន្តែខាងភាគីក្លឹបនៅឯអ៊ីតាលី មិនទាន់រកបានខ្សែប្រយុទ្ធច្បាស់លាស់មួយមកជំនួសនៅឡើយ។ ពេលចុងក្រោយនេះ យើងក៏ស្រាប់តែលឺថា សេះបង្កង់ កំពុងគិតគូរចង់នាំយកខ្សែប្រយុទ្ធនៃក្លឹប Arsenal មកចូលរួមនៅពេលខាងមុខ។
នោះគឺកីឡាករវ័យចំណាស់ Pierre-Emerick Aubameyang ដែលពេលចុងក្រោយ បានកើតរឿងរកាំរកូសជាមួយនឹងភាគីក្លឹប Arsenal ព្រោះបានល្មើសវិន័យ ហើយលោក Mikel Arteta ក៏ព្យួរឈ្មោះគេមិនឲ្យចូលលេងប៉ុន្មានប្រកួតមកហើយ។
តាមសារព័ត៌មាន Gazzetta dello Sport ចុះផ្សាយថា Juventus ចង់ឆ្មក់យកឱកាសសារនេះ ចូលទៅចរចាជាមួយកីឡាករហ្គាបុង និងសួរនាំភាគីក្លឹបអាណាព្យាបាល Arsenal អំពីការនាំយកគេមកទីក្រុង Turin នៅទីផ្សារដោះដូរខែមករាខាងមុខ។
យើងមិនច្បាស់ថា Arsenal នឹងគិតបែបណានោះទេ ព្រោះធ្លាប់លឺដំណឹងដូចគ្នាថា Aubameyang អាចនឹងផ្ទេរទៅក្លឹបយក្សអេស្ប៉ាញ Barcelona ដល់ឥឡូវមកថែម Juventus ចង់បានមួយថែមទៀត។ ចំពោះហាងឆេងតម្លៃខ្លួន កីឡាករត្រូវផុតកុងត្រានាចុងខែមិថុនា ឆ្នាំ ២០២៣ អាចថ្លៃតែល្បាក់ ១៥ លានអឺរ៉ូប៉ុណ្ណោះ៕
ប្រភព៖ Gazzetta dello Sport