ទីផ្សារដោះដូររដូវរងា នឹងចាប់បើកដំណើរការពីថ្ងៃទី ១ មករាខាងមុខតទៅ ហើយគេជឿថា ក្លឹបធំៗជាច្រើននៅអឺរ៉ុប នឹងសកម្មខ្លាំងលើការចរចា ក៏ដូចជាដោះដូរកីឡាករចំណូលថ្មី ផ្អែកទៅតាមតម្រូវការ ក៏ដូចជាលទ្ធភាពដែលពួកគេមាន។
ក្នុងអត្ថបទនេះ ទំព័រ CTS Sports សូមធ្វើការច្របាច់ ៣ រឿងបញ្ចូលគ្នា នូវចចាមអារ៉ាមដែលកំពុងតែក្តៅគគុកឲ្យអ្នកគាំទ្របានដឹង៖
៣) Real Madrid ចង់បានខ្សែការពារ Jules Kounde
កីឡាករបារាំង ទើបតែបង្កើតរឿងរ៉ាវគួរឲ្យចាប់អារម្មណ៍កាលពីថ្ងៃមុន បន្ទាប់ពីគប់បាល់ចូលពេញមុខ Jordi Alba ហើយថ្មីៗនេះក៏ស្រាប់តែលឺដំណឹងថា សមត្ថភាពរបស់គេកំពុងទាក់ចិត្តក្លឹប Real Madrid ជាខ្លាំង។
បើតាមសារព័ត៌មាន El Nacional ចុះផ្សាយថា ក្លឹបអធិរាជស បាននឹងកំពុងត្រៀមថវិកា ៤០ លានអឺរ៉ូ បូកបន្ថែមនឹងខ្សែប្រយុទ្ធ Marco Asensio ជាថ្នូរប្តូរស្មើយក Kounde ចេញពីក្លឹបអាណាព្យាបាល Sevilla។
យើងមិនច្បាស់ថា ភាគីក្លឹបដែលដឹកនាំដោយអ្នកចាត់ការលោក Julen Lopetegui ព្រមទទួលយកសំណើនេះឬអត់ទេ តែត្រឹមដឹងថា អតីតកាលគ្រូសញ្ជាតិអេស្ប៉ាញ ក៏ស្រលាញ់ពេញចិត្តលើសមត្ថភាពខ្សែប្រយុទ្ធ Asensio ខ្លាំងណាស់ផងដែរ។ ក្រៅពី Real Madrid សម្រាប់កីឡាករបារាំងខាងលើ ក៏ធ្លាប់ត្រូវបានក្លឹប Chelsea និង Man Utd តាមសម្លឹងឥតឈប់ ពោលតាំងពីពេលតម្លៃខ្លួនរបស់គេនៅខ្ពស់ល្បាក់ ៨០ លានអឺរ៉ូ ហើយឥឡូវចុះមកត្រឹមចន្លោះ ៥០ ទៅ ៦០ លានអឺរ៉ូប៉ុណ្ណោះ។
២) Anthony Martial ចង់ផ្ទេរទៅក្លឹប Sevilla
ក្រោយខ្សត់ឱកាសបង្ហាញខ្លួន ជាមួយក្លឹប Man Utd សម្រាប់ខ្សែប្រយុទ្ធបារាំង Martial ក៏រំអុកឆ្ពោះទៅរកផ្លូវបែក ហើយតាមព័ត៌មានលេចលឺចុងក្រោយ គេបានបើកបេះដូង ព្រមផ្ទេរទៅកាន់ក្លឹប Sevilla។
យ៉ាងណាការចរចា ហាក់ត្រូវបានរាំងស្ទះ ក៏ដោយសារតែកីឡាករវ័យ ២៦ ឆ្នាំ ទាមទារតម្លៃពលកម្មរាងខ្ពស់ជ្រុល ដល់ទៅ ២៤០ ០០០ ផោន/សប្តាហ៍ ដែលកម្រិតប៉ុណ្ណេះ ក្នុងស្ថានភាពរីករាលដាលជំងឺ COVID-19 សម្រាប់ក្លឹបកម្រិតមធ្យមដូចជា Sevilla គឺពិបាកនឹងផ្តល់ឲ្យខ្លាំងណាស់។ ដូច្នេះមានន័យថា ការផ្ទេរមានភាគរយអាចសម្រេចទៅបាន លុះត្រាតែ Martial គេព្រមទម្លាក់តម្លៃពលកម្ម ឲ្យទាបជាងនេះ យ៉ាងហោច ៤០ ទៅ ៥០ ភាគរយ។
១) ការផ្ទេររបស់ Ferran Torres ទៅកាន់ក្លឹប Man City
តាមព័ត៌មានអាប់ដែតចុងក្រោយ គឺកីឡាករអេស្ប៉ាញ Torres បានព្រមព្រៀង ផ្ទេរទៅកាន់ក្លឹប Barcelona ហើយ ស្របពេលដែលកិច្ចព្រមព្រៀងរវាងភាគីក្លឹបអាណាព្យាបាល Man City និងក្លឹបនៅតំបន់កាតាឡូញ៉ា ក៏ឈានដល់ការសម្រេចហើយដែរ។
តម្លៃផ្ទេរចេញ ៥៥ លានផោន គឺពិតណាស់ អ្នកមានបុណ្យនឹងមិនអាចចំណាយទាំងដុលបានទេ ដូច្នេះហើយក៏សម្រេចចរចានៅលក្ខខណ្ឌបង់រំលស់ ពោលនឹងធ្វើការទូទាត់លុយ ៤ លើក ទៅឲ្យ Man City ដែលម្តងចាយជាង ១០ លានផោន។ នេះបើតាមសារព័ត៌មាន Marca បានចុះផ្សាយ។
យ៉ាងណាក្នុងកិច្ចព្រមព្រៀងដដែលនេះ ក៏មានភ្ជាប់នៅលក្ខខណ្ឌពិសេស ថាប្រសិនណាចន្លោះសុពលភាពកុងត្រានៃការឈរជើងរបស់ Torres អាចជួយឲ្យ អ្នកមានបុណ្យលើកពាន Champions League ឬឈ្នះពានឯកត្តជន Ballon d’Or ឬសូម្បីតែពានស្បែកជើងមាសប្រចាំតំបន់អឺរ៉ុប នោះតម្លៃខ្លួនរបស់គេ នឹងហក់ឡើងពី ៥៥ លាន មកដល់ ៨៥ លានផោន នៅពេលអនាគត៕
ប្រភព៖ បរទេស