បើទោះបីជាសុពលភាពកុងត្រា ត្រូវផុតនៅចុងខែមិថុនា ឆ្នាំ ២០២៤ តែមានភាគរយខ្ពស់ដែលកីឡាករបារាំង Anthony Martial នឹងត្រូវចាកចេញពីក្លឹប Man Utd ត្រឹមទីផ្សារដោះដូរខាងមុខ ក្រោយមានការបង្ហើបតម្រុយច្បាស់ៗ ចេញពីភ្នាក់ងាររត់ការ។
ក៏ដោយសារតែខ្សែប្រយុទ្ធវ័យ ២៦ ឆ្នាំ គេមិនទទួលបានពេលវេលាបង្ហាញខ្លួនជាប់លាប់នៅក្លឹបបិសាចក្រហម ហើយតំណែងប្រយុទ្ធកណ្តាលរបស់គេ ក៏គរជើងគ្នាច្រើន ពោលជាន់ Role ទាំងជាមួយ Cristiano Ronaldo ក៏ដូចជា Edinson Cavani។ តាមដំណឹងចុងក្រោយបង្អស់ លឺថា Martial គេព្រមបើកចិត្តផ្ទេរទៅក្លឹបថ្មី នៅឯអេស្ប៉ាញ គឺ Sevilla តែការចរចាមិនទាន់សម្រេច ១០០ ភាគរយនោះទេ។
វានៅរាំងស្ទះ ជាមួយតម្លៃពលកម្ម ដែលនៅ Man Utd គេអាចទទួលបាន ២៥០ ០០០ ផោន/សប្តាហ៍ ហើយជាការពិត ទៅដល់ Sevilla នឹងមិនអាចទទួលបានក្រាស់ក្រែលបែបហ្នឹងឡើយ។ ឥឡូវភាគីទាំងសងខាង កំពុងចរចាគ្នាជាថ្មី មុនឈានដល់ចម្លើយច្បាស់ការ ថាព្រមផ្ទេរចេញឬអត់ នៅកំឡុងសប្តាហ៍បន្ទាប់។ រំឭកថាជាមួយការឈរជើងជាង ៦ ឆ្នាំនៅទឹកដី Old Trafford សម្រាប់ Martial គេរកបាន ៧៩ គ្រាប់និង Assist ៥០ លើកនៅការបង្ហាញខ្លួនសរុប ២៦៨ ប្រកួត៕
ប្រភព៖ Twitter