បើតាមសារព័ត៌មាន El Chiringuito ចុះផ្សាយថា ក្លឹប Real Madrid ប្រឈមអាចនឹងបាត់បង់កីឡាករកាន់ឆ្នាំមួយរូបទៀត នៅតំណែងបម្រើ បន្ទាប់ពីទើបបាត់បង់ខ្សែការពារកាន់ឆ្នាំ Sergio Ramos ឲ្យទៅក្លឹប PSG កាលពីរដូវក្តៅ។
នោះគឺ Luka Modric ដែលជា Key Player ដ៏សំខាន់របស់អធិរាជស ចាប់តាំងពីឆ្នាំ ២០១២ ក្រោយផ្ទេរចេញពីក្លឹប Spurs។ តាមប្រភពបានឲ្យដឹងថា កីឡាករក្រូអាត អាចនឹងគិតគូរចង់ចាកចេញពីក្លឹប នៅឆ្នាំក្រោយ ២០២២ ពោលគឺក្រោយការឈរជើង ១ ទសវត្សពេញ។
Modric បង្ហាញខ្លួនច្រើនជាង ៤០០ ប្រកួតឲ្យ Real Madrid ហើយក៏លើកពានរង្វាន់ជាហូហែរ រួមទាំង Champions League ៤ លើកផងដែរ។ ដ្បិតបើអាយុរបស់គេ រាងចំណាស់ចូលដល់ ៣៦ ឆ្នាំ តែនៅក្នុងក្រុម ក៏បន្តជាចំណែកសំខាន់ ក្រោមការដឹកនាំរបស់លោក Carlo Ancelotti ដែល ១៨ ប្រកួតរដូវកាលនេះ ចូលរួម Assist ៥ លើក។
យ៉ាងណាជាមួយកុងត្រាដែលសេសសល់ត្រឹមចុងខែមិថុនា ឆ្នាំ ២០២២ គេជឿថា រវាងភាគីក្លឹបនិងកីឡាករមិនអាចឈានដល់កិច្ចព្រមព្រៀងសម្រេចបន្តថ្មីបានឡើយ ក៏ដោយសារតែ Modric ទារកុងត្រាថ្មី ២ ឆ្នាំ ខណៈក្លឹបចង់ឲ្យតែ ១ ឆ្នាំ ពោលស្រដៀងនឹងករណីរបស់ Sergio Ramos ដែរ។ ទ្រនំបន្ទាប់របស់ខ្សែបម្រើខាងលើ ក៏មានភាគរយអាចនឹងត្រលប់ទៅក្លឹបណាមួយនៅទឹកដីអង់គ្លេស៕
ប្រភព៖ El Chiringuito