កាលវិភាគប្រកួតរបស់ក្លឹប Bayern Munich សម្រាប់ឆ្នាំ ២០២១ គឺត្រូវបានបញ្ចប់ហើយ ដោយប្រកួតចុងក្រោយ ទើបតែយកឈ្នះទៅលើ Woflsburg ៤-០។ ជុំបន្ទាប់នៅ Bundesliga គឺក្រុមដឹកនាំដោយលោក Julian Nagelsmann នឹងត្រូវបើកកីឡដ្ឋាន ស្វាគមន៍ក្លឹប Monchengladbach នៅថ្ងៃទី ៨ មករា។
បង្វែរទៅមើលតារាឆ្នើមប្រចាំក្រុម គឺ Robert Lewandowski ប្រចាំឆ្នាំ ២០២១ គេរកបាន ៤៣ គ្រាប់នៅ Bundesliga ល្មមនឹងរុញឲ្យគេ អាចក្លាយជាអ្នកគ្រងកំណត់ត្រាថ្ម នាមកីឡាកររកបានគ្រាប់បាល់ច្រើនបំផុតប្រចាំឆ្នាំទោល នៅប្រវត្តិសាស្រ្តលីគកំពូលអាល្លឺម៉ង់ ដែលអ្នកគ្រងចាស់គឺ Gerd Muller ធ្វើបាន ៤២ គ្រាប់ នៅឆ្នាំ ១៩៧២។
ជាងនេះ តួលេខគ្រាប់បាល់ជារួមទាំងក្លឹបបូកជម្រើសជាតិ នៅគ្រប់ការប្រកួត របស់កីឡាករប៉ូឡូញ ក៏បានរំកិលមកតាមស្មើកំណត់ត្រាខ្នាតយក្ស របស់ Cristiano Ronaldo ផងដែរ។ ជាមួយការបង្ហាញខ្លួនសរុប ៥៩ ប្រកួត Lewandowski រកបាន ៦៩ គ្រាប់ឯណោះ។
តាមរបាយការណ៍ពី TransferMarkt យើងធ្វើការបង្ហាញ ការរកបានគ្រាប់បាល់ច្រើនបំផុតប្រចាំឆ្នាំទោល ទាំង ១០ លើក នៅសតវត្សទី ២១៖
១០) Lionel Messi ក្លឹប Barcelona និងជម្រើសជាតិអាហ្សង់ទីន នៅឆ្នាំ ២០១៤ ធ្វើបាន ៥៨ គ្រាប់
៩) Lionel Messi ក្លឹប Barcelona និងជម្រើសជាតិអាហ្សង់ទីន នៅឆ្នាំ ២០១១ ធ្វើបាន ៥៩ គ្រាប់
៨) Lionel Messi ក្លឹប Barcelona និងជម្រើសជាតិអាហ្សង់ទីន នៅឆ្នាំ ២០១៦ ធ្វើបាន ៥៩ គ្រាប់
៧) Lionel Messi ក្លឹប Barcelona និងជម្រើសជាតិអាហ្សង់ទីន នៅឆ្នាំ ២០១០ ធ្វើបាន ៦០ គ្រាប់
៦) Cristiano Ronaldo ក្លឹប Real Madrid និងជម្រើសជាតិព័រទុយហ្គាល់ នៅឆ្នាំ ២០១១ ធ្វើបាន ៦០ គ្រាប់
៥) Cristiano Ronaldoក្លឹប Real Madrid និងជម្រើសជាតិព័រទុយហ្គាល់ នៅឆ្នាំ ២០១៤ ធ្វើបាន ៦១ គ្រាប់
៤) Cristiano Ronaldo ក្លឹប Real Madrid និងជម្រើសជាតិព័រទុយហ្គាល់ នៅឆ្នាំ ២០១២ ធ្វើបាន ៦៣ គ្រាប់
៣) Cristiano Ronaldo ក្លឹប Real Madrid និងជម្រើសជាតិព័រទុយហ្គាល់ នៅឆ្នាំ ២០១៣ ធ្វើបាន ៦៩ គ្រាប់
២) Robert Lewandowski ក្លឹប Bayern Munich និងជម្រើសជាតិប៉ូឡូញ នៅឆ្នាំ ២០២១ ធ្វើបាន ៦៩ គ្រាប់
១) Lionel Messi ក្លឹបBarcelona និងជម្រើសជាតិអាហ្សង់ទីន នៅឆ្នាំ ២០១២ ធ្វើបាន ៩១ គ្រាប់
ដូច្នេះមានន័យថា ប្រចាំឆ្នាំ ២០២១ គឺ Lewandowski ជាអ្នកនាំមុខគេ រួចក៏បានយកឈ្នះទៅលើ Ronaldo និង Messi ផងដែរ។ គិតសម្រាប់ឆ្នាំនេះ ស្ថិតិក្លឹបបូកជម្រើសជាតិ Ronaldo បង្ហាញខ្លួន ៦៣ ប្រកួត រកបាន ៤៦ គ្រាប់ នៅសល់ ២ ប្រកួតក្នុងដៃ ស្របពេលដែល Messi បង្ហាញខ្លួន ៦០ ប្រកួត រកបាន ៤៣ គ្រាប់ នៅសល់មួយប្រកួតក្នុងដៃ។
ប៉ុន្តែបើនិយាយជារួម ដូចបង្ហាញពីខាងលើ យើងឃើញហើយថា Lewandowski បានជ្រែកចូលបញ្ជី Top 10 ដោយស្មើទាំងកម្រិតរបស់ Ronaldo ប៉ុន្តែធៀបនឹង Messi គឺនៅចាញ់ដល់ទៅ ២២ គ្រាប់ឯណោះ។ ដូច្នេះហើយយើងនឹងរង់ចាំមើលបន្តទៀត តើការធ្វើបាន ៩១ គ្រាប់នៅឆ្នាំទោល នឹងត្រូវរង់ចាំដល់ឆ្នាំណា ឬទសវត្សណា ទើបមានកីឡាករដទៃ អាចឡើងមកបំបែកបាន?