ក្នុងនាមជាកីឡាករបាល់ទាត់មួយរូប ក្រៅពីទាមទារសមត្ថភាព បច្ចេកទេស ក៏ដូចជាទេពកោសល្យ ដែលត្រូវបង្ហាញចេញលើទីលាន ទៀតសោតផ្នែកកាយសម្បទាក៏ជាតម្រូវការដ៏ចាំបាច់ដូចគ្នា។
ការដែលកីឡាករមានមាឌធំ រាងកាយរឹងមាំ នោះក៏អាចឲ្យពួកគេ មិនពិបាកក្នុងការប្រជែងយកបាល់ពីកីឡាករក្រុមគូប្រជែង ហើយទៀតសោតក៏វាជួយពង្រឹងទាំងជំហរនៃការរត់ និងការបញ្ចប់ទីផងដែរ។ ងាកមកមើលកីឡាករទាំង ៥ រូបនេះ អតីតកាលរាងកាយរបស់ពួកគេ មើលទៅតូច ស្គមស្គាំង តែរំលងប៉ុន្មានឆ្នាំក្រោយ ក៏ដូចគេចាត់បត់ ១៨០ ដឺក្រេ ផ្លាស់មកជាបុរសសាច់ដុំ មាឌធំ មិនគួរឲ្យជឿ៖
៥) Marcus Rashford ក្លឹប Man Utd
ខ្សែប្រយុទ្ធអង់គ្លេស បានមានឱកាសមកបង្ហាញខ្លួននៅឈុតធំ ឲ្យបិសាចក្រហមកាលពីរដូវកាល ២០១៥/១៦ ហើយពេលនោះ សភាពគេ ត្រឹមជាយុវជនម្នាក់ ដែលមានរាងកាយស្គមស្គាំង មើលទៅមិនសូវជាមានកម្លាំងកំហែងពេញលេញនោះទេ។
ក្រោយការអភិវឌ្ឍខ្លួន លុតដំខ្លួនត្រឹមមួយពព្រិចភ្នែក រំលងពីមួយរដូវកាលទៅមួយរដូវកាល គេក៏សង្កេត ឃើញយុវជនវ័យ ២៣ ឆ្នាំ បានមានការប្រែប្រួលផ្នែកកាយសម្បទាមិនគួរឲ្យជឿ ហើយឥឡូវនិយាយបានថា ចំណោមកីឡាករអាយុស្រករ ២២-២៣ ឆ្នាំ គឺរាងកាយ Rashford នេះហើយ មានភាពពេញលក្ខណៈល្អជាងគេ។
៤) Hulk ក្លឹប Atletico Mineiro
កីឡាករប្រេស៊ីល Hulk មានមាឌធំ តាំងពីដើម ប៉ុន្តែកីឡាកររបៀបគេ បើមិនបានដុសខាត់ខ្លួនឯងឲ្យបានល្អ នោះរាងកាយនឹងប្រែទៅជាធាត់ លើសទម្ងន់ តែនេះ គេប្រែមកជាបុរសសាច់ដុំ រឹងមាំដូចជាយក្ស អាចថាកីឡាករល្មមៗសឹងតែមិនហ៊ានរត់ចូលមកប្រជែង។
គេលេងតំណែងប្រយុទ្ធ ហើយផ្ទុះការចាប់អារម្មណ៍ខ្លាំង កំឡុងពេលគេឈរជើងឲ្យក្លឹបក្នុងប្រទេសចិន ចន្លោះឆ្នាំ ២០១៦ ដល់ ២០២១ មុនផ្ទេរមកក្លឹបនៅប្រទេសកំណើត Atletico Mineiro មកទល់សព្វថ្ងៃ។
៣) Leon Goretzka ក្លឹប Bayern Munich
ជាខ្សែបម្រើ ដែលពូកែចោះបាល់ចូលក្នុងប្រអប់ឲ្យក្លឹបអាល្លឺម៉ង់ ហើយនិយាយពីការអភិវឌ្ឍផ្នែកកាយសម្បទារបស់គេ គឺឃើញថា បានផលលឿនជាងនរណាៗទាំងអស់។
លទ្ធផលផ្លាស់ប្តូរ ១៨០ ដឺក្រេ ត្រឹមតែរយៈពេលជាង ១ ឆ្នាំ ដោយដូចបង្ហាញក្នុងរូប គឺសន្លឹកទីមួយ ពេល Goretzka គេទើបមកចូលរួមនៅ Bayern ថ្មីថ្មោង ហើយរំលងតែប៉ុន្មានខែ ទៅមើលសន្លឹកទីពីរ ត្រង់ផ្នែកសាច់ដុំដៃ សាច់ដុំពោះ គឺរីកធំដូចគេជប់ ដល់ថ្នាក់កីឡាកររួមអាជីពជាច្រើន បានផ្ញើសារសួរនាំពីអាថ៌កំបាំងនៃការធ្វើលំហាត់ប្រាណរបស់បុរសវ័យ ២៦ ឆ្នាំ។
២) Cristiano Ronaldo ក្លឹប Man Utd
មិនអាចរំលងបានទេ នូវឈ្មោះតារាឆ្នើមសញ្ជាតិព័រទុយហ្គាល់ ហើយអ្វីដែលយើងនៅតែសរសើរមិនដាច់ពីមាត់ គឺនៅពេលអាយុ Ronaldo កាន់តែច្រើន រាងកាយរបស់លោកបែរជាមើលទៅកាន់តែក្មេង។
បើតាមដឹង ដំណើរនៃការអភិវឌ្ឍកាយសម្បទារបស់កីឡាករវ័យ ៣៦ ឆ្នាំ គឺផ្តោតចម្បងលើរបៀបរស់នៅ ការធ្វើលំហាត់ប្រាណ និងជាពិសេសគឺរបបអាហារ ពោលមិនចំណាយច្រើនទេ តែសំខាន់ជ្រើសយកតែអាហារសុខភាពមកទទួលទាន ហើយលោកមិនប៉ះសុរាដាច់ខាត។
១) Adama Traore ក្លឹប Wolves
ជាសុបិនអាក្រក់ ដែលខ្សែការពារជាច្រើន មិនចង់ជួបលើទីលាន នោះគឺ Traore ខ្លាំងត្រង់ល្បឿន ខ្លាំងត្រង់ភាពរឹងមាំ។
កាលពីអតីតកាល កីឡាករលេងតំណែងប្រយុទ្ធស្លាប គេមានរាងកាយមិនពេញលក្ខណៈនោះទេ ជាពិសេសនៅឈុតថ្នាល Barcelona លុះក្រោយមក ពេលផ្ទេរមកក្លឹបអង់គ្លេស Wolves សម្រាប់បុរសសញ្ជាតិអេស្ប៉ាញ បានធ្វើឲ្យគ្រប់គ្នាភ្ញាក់ផ្អើលខ្លាំង ល្មមអាចរាប់បានថា Traore ជាកីឡាករមានសាច់ដុំធំជាងគេហើយនៅ Premier League៕
ប្រភព៖ Sportskeeda