ពានរង្វាន់ប្រចាំតំបន់អាស៊ាន AFF Championsip ឬ AFF Suzuki Cup 2020 ទីបំផុតបានរកឃើញក្រុមចំនួន ៤ ដែលត្រូវឡើងទៅកាន់វគ្គពាក់កណ្ដាលផ្ដាច់ព្រ័ត្រហើយ បន្ទាប់ពីបិទបញ្ចប់ការប្រកួតវគ្គចែកពូលកាលពីពេលកន្លងទៅ។
ជាការសោកស្ដាយសម្រាប់ក្រុមគោព្រៃកម្ពុជា ដោយយើងឆ្លងកាត់ ៤ ប្រកួត ទទួលជ័យជម្នះតែ ១ ប៉ុណ្ណោះ គឺការយកឈ្នះក្រុមឡាវ ៣-០ ខណៈការប៉ះឥណ្ឌូណេស៊ី, ម៉ាឡេស៊ី និងវៀតណាម យើងរបូតសរុប ១១ គ្រាប់។
ដោយឡែកសម្រាប់ក្រុម ដែលត្រូវឡើង ក្នុងនោះគឺនៅពូល A មានក្រុមជម្រើសជាតិថៃ ដែលឈរលេខ ១ មាន ១២ ពិន្ទុ ស្របពេលដែលក្រុមម្ចាស់ផ្ទះសិង្ហបុរី ឈរលេខ ២ មាន ៩ ពិន្ទុ។ រីឯនៅពូល B ក្រុមឥណ្ឌូណេស៊ី និងវៀតណាម មាន ១០ ពិន្ទុស្មើ តែក្រោយប្រៀបធៀបស្ថិតិគ្រាប់បាល់ គឺសម្រេចឲ្យក្រុមគ្រុឌ ឈរលេខ ១ និងក្រុមនាគក្រហមឈរលេខ ២។ ដូច្នេះមានន័យថា ការឆ្ពោះទៅវគ្គខ្វែង ៤ ក្រុមចុងក្រោយ គឺសិង្ហបុរី នឹងត្រូវជួបឥណ្ឌូណេស៊ី ស្របពេលដែលវៀតណាម នឹងត្រូវជួបថៃ។
ការប្រកួតគឺលេង ២ ជើង ចន្លោះថ្ងៃទី ២២ ដល់ ២៦ ធ្នូ មុនចម្រាញ់យក ២ ក្រុម ឆ្ពោះទៅវគ្គចុងក្រោយ ហើយសម្រេចលទ្ធផលតាមរយៈការប្រកួត ២ ជើងដូចគ្នា គឺនៅថ្ងៃទី ២៩ ធ្នូ និងទី ១ មករា។
មានការចោទសួរមកកាន់ទំព័រ CTS Sports ដោយចង់ដឹងថា តើពានរង្វាន់ប្រចាំតំបន់អាស៊ាន ដែលមានអាយុកាល ២៥ ឆ្នាំមួយនេះ ចំពោះប្រាក់រង្វាន់វិញ តើក្រុមឈ្នះជើងឯក អាចទទួលបានប៉ុន្មាន?
បើតាមការចុះផ្សាយពីគេហទំព័រ TheSortsGrail បានឲ្យដឹងថា ដោយផ្អែកតាមទិន្នន័យបង្ហាញពីអគ្គលេខាធិការសមាគមបាល់ទាត់ប្រចាំប្រទេសថៃ លោក Patit Suphaphong សម្រាប់ប្រាក់រង្វាន់នៅ AFF Suzuki Cup មានបែងចែកដូចខាងក្រោម៖
ក្រុមនីមួយៗ ដែលបានឡើងមកដល់វគ្គពាក់កណ្ដាលផ្ដាច់ព្រ័ត្រ អាចទទួលបានមួយក្រុម ៥០ ០០០ ដុល្លារ
ក្រុមឈ្នះជើងឯករង ទទួលបាន ១០០ ០០០ ដុល្លារ
ក្រុមឈ្នះជើងឯក ទទួលបាន ៣០០ ០០០ ដុល្លារ
ដោយឡែកចំពោះក្រុមដែលមានឈ្មោះមកចូលរួម នៅវគ្គចែកពូល ក៏ដូចជាកីឡាករដែលឈ្នះ Top Scorer ឬពានឯកត្តជនផ្សេងទៀត ពុំមានទិន្នន័យបង្ហើបច្បាស់នោះឡើយ ថាអាចទទួលបានប្រាក់រង្វាន់ប៉ុន្មាន។
រំឭកដែរថា ពានរង្វាន់ខាងលើ គឺស្ថិតក្រោមការរៀបចំដោយសហព័ន្ធបាល់ទាត់ប្រចាំតំបន់អាស៊ានហៅកាត់ AFF ធ្វើឡើងក្នុងគោលបំណង ប្រកួតប្រជែងរកក្រុមខ្លាំងប្រចាំតំបន់អាស៊ីអាគ្នេយ៍។ ក្រុមដែលឈ្នះពានរង្វាន់នេះច្រើនជាងគេ គឺថៃ ដែលលើកបាន ៥ សម័យកាល។ ស្របពេលដែលកម្ពុជា មិនធ្លាប់បានឈ្នះនោះទេ ហើយបានឡើងមកដល់វគ្គចែកពូល ៨ លើក៕
ប្រភព៖ TheSportsGrail