អតីតកីឡាករជើងចាស់ លោក Ronaldo Nazario ដូចអ្នកបានដឹងស្រាប់ហើយ លោកគឺជាម្ចាស់ក្លឹបអេស្ប៉ាញ Real Valladolid ដែលបានកាន់កាប់តាំងពីខែកញ្ញា ឆ្នាំ ២០១៨ ក្រោយក្លាយជាម្ចាស់ភាគហ៊ុនធំដល់ទៅ ៨២ ភាគរយ។
ដល់ឥឡូវ បុរសសញ្ជាតិប្រេស៊ីលបានប្រកាសដំណឹងថ្មីមួយទៀតហើយ នោះគឺការទិញយកក្លឹបមួយបន្ថែមទៀត សារនេះជាក្លឹបនៅឯប្រទេសកំណើតប្រេស៊ីល គឺ Cruzeiro។ កិច្ចព្រមព្រៀងបានសម្រេច កាលពីថ្ងៃសៅរ៍ ក្នុងទីក្រុង Sao Paulo ហើយការទិញយកសារនេះ Ronaldo មានបំណងចង់ជួយឲ្យក្លឹប Cruzeiro អាចឡើងមកកាន់លីគកំពូលប្រេស៊ីលវិញ ក្រោយពីធ្លាក់ចេញតាំងឆ្នាំ ២០១៩។
Ronaldo និយាយ៖ “ខ្ញុំមានរឿងជាច្រើនដែលត្រូវចូលរួមចំណែកជួយក្លឹបមួយនេះ យើងនឹងខិតខំឲ្យបានខ្លាំងទាំងអស់គ្នា ដើម្បីសម្រេចមហិច្ឆតាដ៏ធំមួយសម្រាប់ក្លឹប Cruzeiro”។
គួរបញ្ជាក់ដែរថា Cruzeiro ក៏ធ្លាប់ជាអតីតក្លឹបរបស់ Ronaldo ផងដែរ ដោយកាលជាកីឡាករលោកបានឈរជើងនៅទីនោះ ចន្លោះឆ្នាំ ១៩៩៣ ដល់ ១៩៩៤ មុនពេលមានការទទួលស្គាល់ និងវិវត្តខ្លួនផ្ទេរមកក្លឹប PSV នៅតំបន់អឺរ៉ុប៕
ប្រភព៖ Marca