ក្លឹបបិសាចក្រហម Manchester United ត្រូវបានគេរាយការណ៍ថា ត្រៀមនឹងបាត់បង់កីឡាករដល់ទៅ ២ រូប នៅទីផ្សារដោះដូររដូវរងាខាងមុខ នោះគឺដូចជាខ្សែបម្រើ Jesse Lingard និងខ្សែប្រយុទ្ធ Anthony Martial។
កីឡាករទាំងពីររូប កាលពីអតីតកាលក្រោមការដឹកនាំរបស់គ្រូចាស់លោក Ole Gunnar Solskjaer គឺគេទទួលបានឱកាសច្រើនគួរសម លុះមកដល់ជំនាន់គ្រូថ្មី លោក Ralf Rangnick ក៏នាំឲ្យពួកគេបែរខ្សត់ឱកាសទៅវិញ ជាហេតុនាំឲ្យចចាមអារ៉ាមចាកចេញ កាន់តែមើលទៅ កៀកនឹងសម្រេចទៅបាន។
សម្រាប់ Lingard មានក្លឹបធំ ២ នៅអង់គ្លេស កំពុងចាំត្រងយក ជួនពេលដែលសុពលភាពកុងត្រាក៏ត្រូវផុតនៅចុងខែមិថុនា ឆ្នាំ ២០២២។ នោះគឺអាចជាក្លឹប West Ham United ដែលគេធ្លាប់ទៅចូលរួមក្នុងលក្ខខណ្ឌខ្ចីជើង ឬមួយផ្សេងទៀតអាចជាក្លឹប Newcastle United។
រីឯ Martial វិញ គឺអាចជាក្លឹប Atletico Madrid ដែលទើបលេចលឺប៉ុន្មានថ្ងៃមុន ថាចង់បានកីឡាករបារាំងឲ្យទៅចូលរួមនៅពេលខាងមុខ ឬមួយទៀតអាចជាក្លឹប PSG ដែលចង់យកគេត្រលប់ទៅប្រទេសកំណើតវិញ។ ទន្ទឹមដែលសុពលភាពកុងត្រាត្រូវផុតនៅចុងខែមិថុនា ឆ្នាំ ២០២៤ ហេតុនេះតម្លៃខ្លួនរបស់ Martial អាចថ្លៃល្បាក់ ៣០ លានផោន៕
ប្រភព៖ Marca