ក្លឹបមេឃខៀវ Manchester City ត្រូវបានគេរាយការណ៍ថា កំពុងត្រៀមចរចាដំឡើងថ្លៃពលកម្មទ្វេដង សម្រាប់ខ្សែបម្រើប្រយុទ្ធ Bernardo Silva បន្ទាប់ពីឃើញថា រយៈពេលចុងក្រោយបង្ហាញទម្រង់លេងល្អ និងរកបានគ្រាប់បាល់ជាបន្តបន្ទាប់។ កីឡាករព័រទុយហ្គាល់ រដូវកាលនេះរាប់បានជាចំណែកសំខាន់ប្រចាំក្រុមលោក Pep Guardiola ដោយរកបាន ៧ គ្រាប់និង Assist ២ លើកហើយ។
បច្ចុប្បន្ន Bernardo ទទួលបានថ្លៃពលកម្ម ១៥០ ០០០ ផោន/សប្តាហ៍ ឈរលើសុពលភាពកុងត្រាដល់ចុងខែមិថុនា ឆ្នាំ ២០២៥។ យ៉ាងណា City ក៏គិតគូរដល់គេផងដែរ ដោយចង់គុណថ្លៃពលកម្មទ្វេដង ពោលដំឡើងដល់ ៣០០ ០០០ ផោន/សប្តាហ៍ ស្មើនឹងកម្រិតរបស់ Raheem Sterling ក៏ដូចជា Jack Grealish។ នេះបើតាមសារព័ត៌មាន TheSun។
ទំហំប្រាក់ពលកម្មនេះ រុញឲ្យគេក្លាយជាកីឡាករស៊ីថ្លៃលំដាប់ទី ២ នៅក្លឹប Man City ហើយនៅទាបជាងតែ Kevin de Bruyne ម្នាក់ប៉ុណ្ណោះ ដែលរកបាន ៣៨៥ ០០០ ផោន/សប្តាហ៍។ បន្ថែមពីការចរចាថ្លៃពលកម្មថ្មី ក្លឹបក៏ចង់បន្ថែមកុងត្រាជាមួយកីឡាករព័រទុយហ្គាល់ លើសពីឆ្នាំ ២០២៥ ផងដែរ។
គួរបញ្ជាក់ថា City រាប់បានជាក្លឹបកាន់ឆ្នាំរបស់ Bernardo ព្រោះគេមកចូលរួមនៅទីនេះ តាំងពីរដូវក្តៅ ឆ្នាំ ២០១៧។ សរុបការបង្ហាញខ្លួន ២២៣ ប្រកួត គេរកបាន ៤២ គ្រាប់និង Assist ៤៦ លើក ដោយបានលើកពានរង្វាន់សរុប ១០ លើក៕
ប្រភព៖ TheSun