Christian Eriksen ទីបំផុតបានបញ្ចប់កុងត្រាជាមួយក្លឹប Inter Milan ហើយ ព្រោះដោយសារច្បាប់នៅប្រទេសអ៊ីតាលី អត្តពលិកទាំងអស់មិនអាចបន្តអាជីព ដោយប្រើប្រាស់ថ្មជំនួយក្នុងបេះដូងនោះទេ។ ហេតុនេះហើយ បើទោះបីកីឡាករចង់លេង ក៏ច្បាប់មិនអនុញ្ញាតនោះដែរ អ៊ីចឹងទើបសម្រេចឈានមកដល់ផ្លូវបែក។
យ៉ាងណាសម្រាប់កីឡាករសញ្ជាតិដាណឺម៉ាក ដែលជួបបញ្ហាកាលពីព្រឹត្តិការណ៍ Euro 2020 កន្លងទៅ ក៏មិនទាន់សម្រេចចូលនិវត្តនោះដែរ ហើយឥឡូវទទួលដំណឹងមកថា ក្លឹបនៅ Premier League មួយចំនួនធំ បានទាក់ទងមកគេហើយ ព្រោះអីច្បាប់នៅចក្រភពអង់គ្លេសសម្រាប់កីឡាករគឺអាចលេងបានជាធម្មតា ដ្បិតត្រូវប្រើប្រាស់ថ្មជំនួយបេះដូងក៏ដោយ។
នេះដូចតែករណី Daley Blind កំពុងលេងឲ្យក្លឹប Ajax និងឈរជើងនៅក្របខ័ណ្ឌ Champions League កន្លងទៅ ក៏គេមានប្រើប្រាស់ថ្មជំនួយបេះដូងដូចគ្នា។ ជាក់ស្តែងសម្រាប់ Eriksen គេទើបតែអាយុ ២៩ ឆ្នាំ ដូច្នេះទើបមិនទាន់ចង់ចូលនិវត្តហើយបើមានឱកាស គឺគេនឹងនៅតែបន្ត។
ចំពោះក្លឹបនៅ Premier League ដែលអាចនឹងនាំយក Eriksen មិនទាន់ច្បាស់ថាក្លឹបមួយណានោះទេ ស្របពេលដែលអតីតកាលគេធ្លាប់បម្រើអាជីពឲ្យក្លឹប Tottenham Hotspur បានរយៈ ពេល ៧ ឆ្នាំដែរ។ ក្រៅពីក្លឹបនៅអង់គ្លេស ក៏លឺដំណឹងថា អាចជាអតីតក្លឹបចាស់ Odense BK នៅឯប្រទេសដាណឺម៉ាកក៏ចង់បានគេដូចគ្នា៕
ប្រភព៖ Metro