អតីតខ្សែការពារនៃក្លឹប Liverpool លោក Jose Enrique បានបង្ហាញការយល់ឃើញថា ទៅពេលខាងមុខ កំឡុងទីផ្សារដោះដូររដូវរងា ប្រសិនជាចរចាត្រូវ នោះក្រុមដឹកនាំដោយលោក Jurgen Klopp គួរណាតែយកខ្សែប្រយុទ្ធថ្មីមួយរូប ចេញពី ក្លឹប Real Sociedad នៃក្របខ័ណ្ឌ La Liga។
នោះគឺ Alexander Isak ដែលគេបង្ហាញទម្រង់លេងយ៉ាងល្អ ទាំងនៅក្លឹបនិងជម្រើសជាតិ ហើយមានវ័យទើបតែ២២ ឆ្នាំប៉ុណ្ណោះ។ រដូវកាលនេះ បង្ហាញខ្លួនជាប់លាប់ ២០ ប្រកួតឲ្យ Sociedad រកបាន ៦ គ្រាប់និង Assist ២ លើក។ ចំពោះសុពលភាពកុងត្រាត្រូវផុតនៅចុងខែមិថុនា ឆ្នាំ ២០២៦ ហើយអាចមានតម្លៃផ្តាច់កុងត្រាល្បាក់ ៨០ លានផោន។
យ៉ាងណាតាមការលើកឡើងរបស់ Enrique និយាយ៖ “ខ្ញុំដឹងថា ខែមករាជាពេលវេលាចរចាដ៏ពិបាក ព្រោះកីឡាករអាចមានតម្លៃថ្លៃណាស់ តែសម្រាប់ Liverpool បើឲ្យខ្ញុំគិតថាគួរយកនរណា គឺគួរទិញកីឡាករនៅតំបន់ប្រយុទ្ធ ហើយខ្ញុំពេញចិត្តនឹងឲ្យយក Isak ចេញពី Real Sociedad ដោយតាមថាបើយកគេកាលពីរដូវក្តៅឆ្នាំទៅ អាចនឹងមានតម្លៃថោក តែពេលនេះ គេចុះកុងត្រាថ្មីបាត់ទៅហើយ”។
លោកបន្ត៖ “នេះគេមានវ័យតែ ២២ ឆ្នាំ កម្លាំងបាន រឹងមាំល្បឿនលឿន ល្អទាំងការលេងមួយទល់មួយ ហើយក៏អាចលេងស្លាប ការពារ និងតំណែងលេខ ៩ ដោយគេជាជម្រើសល្អសម្រាប់ខ្ញុំ ហើយមិនមែនឲ្យទៅចាយដល់រយលានទេ បើអាចចរចាត្រឹម ៥០ ទៅ ៦០ លានផោនបាន នោះយក Isak មក Liverpool គឺជារឿងល្អបំផុត”៕
ប្រភព៖ SportBible